Victor Osimhen zbarkon në Stamboll

Festë e madhe në Turqi pas mbërritjes së Victor Osimhen, që tashmë është vetëm një hap larg zyrtarizimit si futbollist i Galatasaray-t. Ish-sulmuesi i Napolit mbërriti në Stamboll mbrëmjen e së mërkurës me një fluturim privat, në të cilin ndodheshin edhe Abdullah Kavukcu, zëvendëspresidenti ekzekutiv i klubit turk, dhe ndërmjetësi ndërkombëtar George Gardi, dy figura kyçe në përmbylljen e një negociate të gjatë e të ndërlikuar me Napolin.

Në aeroportin e Stambollit, Osimhen u prit nga mijëra tifozë të Galatasaray-t, të cilët i rezervuan një mikpritje madhështore. Emocionet nuk munguan as nga ana e lojtarit, i cili nuk e fshehu entuziazmin për këtë hap të ri në karrierën e tij.

“Nuk di si t’i përshkruaj emocionet. Jam shumë i lumtur që jam kthyer në vendin që e dua,” deklaroi Osimhen duke pozuar me shallin e Galatasaray-t në duar.

“Nëse më pyesni, tifozët e Galatasaray-t janë më të mirët në botë. Mjafton të shihni turmën që ka ardhur vetëm për një lojtar, kjo tregon dashurinë që kanë për mua. Jam gati të jap gjithçka për suksesin e skuadrës këtë sezon të ri. Historia vazhdon, dhe jam i lumtur që e vazhdoj me Galatasaray-n.”

Transferimi i Osimhen konsiderohet goditja më e madhe në historinë e klubit turk, si në aspektin ekonomik ashtu edhe në imazh. Të enjten, Osimhen do t’i nënshtrohet vizitave mjekësore dhe më pas do të firmosë kontratën e tij të re me Galatasaray-n, duke hapur një kapitull të ri në karrierën e tij dhe në historinë e klubit turk.