Asllani dhe Zielinski drejt largimit nga Interi, ja kush pritet t’i zëvendësojë

Te Interi po zhvillohet një riorganizim i thellë në repartin e mesfushës, i diktuar nga vizioni i trajnerit të ri Cristian Chivu. Klubi zikaltër ka nisur punën për të përforcuar skuadrën, por më parë duhet të sistemojë disa largime të rëndësishme.

Kristjan Asllani është ndër emrat e parë që pritet të largohet.

Mesfushori shqiptar, që erdhi me shumë pritshmëri nga Empoli, nuk është në planet e Chivut dhe po i kërkohet një destinacion i ri.

Pavarësisht interesimit nga Betis Sevilla, Asllani dëshiron të mbetet në Serie A dhe Interi është në kontakt me disa klube për të gjetur zgjidhjen më të mirë për të dy palët.

Një situatë më e komplikuar është ajo e Piotr Zielinskit. Mesfushori polak, i cili nuk shkëlqeu sezonin e kaluar, ka një kontratë deri në vitin 2028 dhe fiton 4.5 milionë euro në sezon, faktorë që e bëjnë transferimin e tij të vështirë. Megjithatë, asgjë nuk përjashtohet në një merkato gjithmonë të paparashikueshme.

Nëse Zielinski largohet, Interi ka në listë dy zëvendësues të mundshëm. I pari është Morten Frendrup i Genoa-s, një nga lojtarët më të spikatur të sezonit të fundit në Serie A. Mesfushori danez vlerësohet rreth 20 milionë euro dhe ka kontratë deri në 2028, ndërsa profili i tij është shumë i pëlqyer nga stafi teknik.

Opsioni tjetër është Mandela Keita i Parmës, një lojtar që Chivu e njeh mirë nga periudha kur drejtonte ekipin “Primavera”. Keita shihet si një mesfushor energjik dhe fleksibël, i aftë të sjellë freski në mesfushën zikaltër.