Newcastle huazon portierin Aaron Ramsdale nga Southampton për një sezon

Newcastle United ka siguruar shërbimet e portierit të Kombëtares së Anglisë, Aaron Ramsdale, nga Southampton në formë huazimi njëvjeçar, ka njoftuar klubi anglez të shtunën.

Njëzet e shtatë vjeçari, i cili sezonin e kaluar ka bërë 125 pritje, numri i dytë më i lartë në Premier League, kishte punuar më parë me trajnerin aktual të Newcastle, Eddie Howe, gjatë kohës së tyre te Bournemouth.

“Aaron është një portier i jashtëzakonshëm... Duke e njohur nga përvoja e mëparshme, e di çfarë mund të sjellë në ekip, si brenda ashtu edhe jashtë fushës. E presim me kënaqësi në grup”, ka thënë Howe.

Newcastle, që e ka përfunduar sezonin e kaluar në vendin e pestë dhe e ka siguruar pjesëmarrjen në Champions, do ta hapë kampionatin me një ndeshje si mysafir kundër Aston Villa më 16 gusht.

Ramsdale i ishte bashkuar Southampton vitin e kaluar nga Arsenal, me një kontratë që zgjat deri në qershor 2028. Ai kishte kaluar te Arsenal në vitin 2021 nga Sheffield United dhe ka qenë titullar për dy sezone, duke ndihmuar klubin të arrijë vendin e dytë në Premier League në sezonin 2022-23, përpara se ta humbte vendin e parë ndaj David Raya sezonin e radhës.