Dronët vetëvrasës ukrainas shkatërrojnë depot e karburantit në Rusi

Droni ukrainas me rreze të gjatë veprimi, i tipit vetëvrasës, ka vazhduar të sulmojë në mënyrë të përsëritur një depo të madhe karburanti në qytetin bregdetar të Socchit, në Rusi, që nga orët e hershme të mëngjesit të sotëm.

Sulmi është pjesë e një vale të re të operacioneve ajrore të ushtrisë ukrainase, e cila duket se ka rifilluar në mënyrë të koordinuar dhe të qëllimshme sulmet ndaj infrastrukturës energjetike të Federatës Ruse.

Në 48 orët e fundit, janë shënuar disa goditje të drejtpërdrejta mbi rafineritë e naftës dhe depot e karburantit në zona të ndryshme të territorit rus, duke dëmtuar furnizimin lokal dhe duke rritur pasigurinë për stabilitetin energjetik në rajonet jugore të vendit. 

Sipas analistëve ushtarakë, kjo fushatë synon jo vetëm dëmtimin e kapaciteteve logjistike dhe furnizuese të ushtrisë ruse, por edhe dërgimin e një mesazhi të qartë për aftësinë e forcave ukrainase për të goditur objektiva strategjikë në thellësi të territorit armik.

Autoritetet ruse nuk kanë dhënë ende një konfirmim zyrtar për përmasat e dëmit, por video të publikuara në rrjetet sociale tregojnë flakë dhe tym të dendur në zonën industriale të Socchit.

Në të njëjtën kohë, Kievi nuk ka komentuar drejtpërdrejt sulmet, duke ndjekur politikën e zakonshme të mospranimit zyrtar të operacioneve të tilla, megjithatë sinjalet janë të qarta – Ukraina ka intensifikuar luftën kundër infrastrukturës ruse të energjisë si pjesë e strategjisë së saj për dobësimin e kapaciteteve ushtarake dhe ekonomike të Moskës.