Projekti 13.5 miliardë euro/ Italia miraton ndërtimin e urës më të gjatë, që lidh Siçilinë me rajonin e Kalabrisë

Qeveria italiane i ka dhënë miratimin përfundimtar një projekti prej 13.5 miliardë eurosh (15.6 miliardë dollarë) për të ndërtuar urën më të gjatë të varur në botë, që lidh ishullin e Siçilisë me rajonin e Kalabrisë, në majë të çizmes së Italisë.

Projektuesit pretendojnë se ura – e cila do të ndërtohet në një nga zonat më aktive sizmike në Mesdhe – do të jetë në gjendje t’i rezistojë tërmeteve.

Është përpjekja e fundit e zyrtarëve italianë për të nisur projektin e Urës së Mesinës – disa e kanë provuar gjatë viteve, por planet më vonë janë anuluar për shkak të shqetësimeve mbi koston, dëmtimin mjedisor, sigurinë ose ndërhyrjen e mundshme të mafias.

Sipas projektit përfundimtar, ura mbi ngushticën e Mesinës do të ketë një gjatësi prej 3.3 km dhe do të shtrihet midis dy kullave 400 metra të larta, me dy linja hekurudhore në mes dhe tre korsi trafiku në të dyja anët.

Roma shpreson ta klasifikojë urën si një shpenzim ushtarak në mënyrë që të llogaritet në objektivin e NATO-s prej 5% të PBB-së së shpenzuar për mbrojtje.

Ministri i Transportit Matteo Salvini, udhëheqësi i partisë së krahut të djathtë Lega dhe një aleat qeveritar i Melonit, festoi këtë moment historik, duke thënë se qëllimi ishte të përfundonte ura midis viteve 2032 dhe 2033.

Ai gjithashtu pretendoi se ura do të krijonte 120,000 vende pune në vit dhe do të sillte rritje ekonomike në zonë. Rajonet e Siçilisë dhe Kalabrisë janë dy nga më të varfrat në Evropë.

Megjithatë, projekti do të duhet të miratohet nga Gjykata Italiane e Auditorëve, si dhe nga agjencitë mjedisore, si në nivel kombëtar ashtu edhe në nivel të BE-së.

Banorët vendas në të dyja anët e ngushticës, pronat e të cilëve mund të shpronësohen, do të duhet gjithashtu të konsultohen dhe mund ta kundërshtojnë ligjërisht vendimin, që do të thotë se ndërtimi i urës mund të vonohet ose të ngecë krejtësisht.

Nuk do të ishte hera e parë që ndërtimi i urës është pezulluar. Që kur u hartuan planet e para për të më shumë se 50 vjet më parë, ide të ndryshme për të janë lënë në pritje për arsye të ndryshme dhe është përballur prej kohësh me kundërshtime të ashpra.

Kjo ka përfshirë shqetësime se shuma të mëdha parash të taksapaguesve do të përvetësoheshin nga mafia siciliane dhe kalabreze, të cilat kanë një ndikim të gjerë mbi politikën dhe shoqërinë në Italinë jugore.