Hojlund kërkon largimin nga Manchester United

Rasmus Hojlund është gati të largohet nga Manchester United nëse klubi finalizon transferimin e Benjamin Sesko nga RB Leipzig. Lëvizja e mundshme e sllovenit shihet si kërcënim direkt për rolin e tij në skuadër.

Raportimet e fundit sugjerojnë se Sesko e ka zgjedhur Unitedin si destinacionin e tij të ardhshëm, me negociatat që po zhvillohen midis dy klubeve për çmimin e kartonit.

Sipas Manchester Evening News, Hojlund e konsideron ardhjen e Seskos si një sinjal të qartë se koha e tij në Old Trafford po shkon drejt fundit. Ai tashmë po shqyrton seriozisht një largim gjatë kësaj vere.

Fillimisht i vendosur të luftojë për vendin e tij në formacion, Hojlund tani beson se Sesko do të jetë zëvendësimi i tij i drejtpërdrejtë, gjë që do ta linte atë në plan të dytë.

Sipas BBC, Manchester United është i gatshëm ta shesë sulmuesin danez për vetëm 30 milionë funte, një rënie e madhe nga 73 milionët që klubi pagoi për të dy vite më parë nga Atalanta.

E ardhmja e Hojlund pritet të jetë sërish në Serie A, ku ai kishte shkëlqyer më parë me fanellën e Atalantës dhe kishte fituar vëmendjen e klubeve të mëdha evropiane.

Roma, Juventus dhe Milan janë tre skuadrat italiane që kanë shprehur interes konkret për ta rikthyer yllin danez në elitën e futbollit italian.