Von der Leyen: BE qëndron krah Ukrainës

Presidentja e Komisionit Evropian, Ursula von der Leyen, ka rikonfirmuar të enjten mbështetjen e palëkundur të Bashkimit Evropian për Ukrainën, duke theksuar se BE-ja do të ketë një rol aktiv në arritjen e një paqeje të drejtë dhe të qëndrueshme. Kjo deklaratë erdhi pas një bisede telefonike me presidentin ukrainas, Volodymyr Zelensky.

Përmes një postimi në platformën X, Von der Leyen bëri të ditur:

“Fola me Volodymyr Zelensky-n rreth zhvillimeve të ditëve të fundit.” Ajo shtoi se diskutimet ishin përqendruar në “hapat e ardhshëm drejt një marrëveshjeje paqeje të negociuar”, duke theksuar angazhimin e vazhdueshëm të Evropës për të mbështetur përpjekjet diplomatike të Kievit.

Biseda ndërmjet dy liderëve nuk u kufizua vetëm në çështjet e paqes. Ata diskutuan gjithashtu për procesin e anëtarësimit të ardhshëm të Ukrainës në Bashkimin Evropian si dhe për rindërtimin e vendit pas përfundimit të luftës. Kjo tregon se BE-ja e konsideron të ardhmen e Ukrainës të pandashme nga familja evropiane, duke ofruar jo vetëm ndihmë politike dhe ushtarake, por edhe mbështetje për integrimin dhe rimëkëmbjen ekonomike.

Deklarata e Von der Leyen përbën një sinjal të qartë të unitetit evropian dhe të përkushtimit për të qëndruar përkrah Ukrainës në çdo fazë – nga fushat e betejës, te tryeza e negociatave dhe procesi i rindërtimit.

“Pozicioni i Evropës është i qartë. Ne e mbështesim plotësisht Ukrainën,” theksoi ajo. “Ne do të vazhdojmë të luajmë një rol aktiv në sigurimin e një paqeje të drejtë dhe të qëndrueshme.”