Bayerni turpëron Tottenhamin në miqësore

Bayerni i Vincent Kompany dha një sinjal të qartë para fillimit të sezonit të ri, duke mposhtur me rezultatin bindës 4-0 kampionët e Europa League, Tottenham Hotspur, në një ndeshje miqësore të zhvilluar në “Allianz Arena”.

Ndonëse ishte një përballje përgatitore, atmosfera ishte e ngrohtë dhe tifozët bavarezë kishin mbushur shkallët e stadiumit për të parë ekipin e tyre në aksion. Bayerni nuk zhgënjeu: që në minutat e para, ekipi vendosi ritmin e ndeshjes.

Goli i parë erdhi në minutën e 12-të. Kush tjetër përveç Harry Kane do ta hapte serinë?

Sulmuesi anglez përfitoi nga një pasim i gjatë i Michael Olise, kontrolloi bukur dhe dërgoi topin në këndin e poshtëm të majtë, duke tundur rrjetën e ish-ekipit të tij, Tottenham.

Vetëm pak minuta më vonë, Bayerni fitoi një penallti pas një faulli të João Palhinha-s ndaj Josip Stanisic, por Kane gaboi nga pika e bardhë duke rrëshqitur dhe dërguar topin mbi tra.

Pas një pjese të parë të balancuar në fundin e saj, Bayerni riktheu dominimin në pjesën e dytë. Olise dhe Kane kombinuan bukur në minutën e 50-të, por traversa i mohoi golin e dytë sulmuesit anglez. Portieri Vicario bëri disa pritje të rëndësishme për Tottenhamin, por nuk mundi të ndalë gjithçka.

Në minutën e 60-të, Kingsley Coman shënoi një gol të bukur pasi u shërbye nga Konrad Laimer, i cili fitoi topin dhe tregoi pjekuri duke asistuar në vend që të gjuante vetë. Ishte vetëm fillimi i spektaklit.

Me ndryshimet e shumta të trajnerit Kompany, në minutat e fundit në skenë dolën të rinjtë. 17-vjeçari Lennart Karl shënoi një gol të bukur pas një depërtimi magjik të Luis Díaz në krahun e majtë. Vetëm gjashtë minuta më pas, edhe një tjetër talent, Jonah Kusi-Asare, shënoi një perlë nga krahu i djathtë, duke vulosur rezultatin 4-0.