Media kroate lartëson Ardian Koznikun! Legjenda e Kosovës me fjalë të mëdha për Hajdukun pas fitores ndaj skuadrës shqiptare

Hajduku i Splitit e mposhti Dinamo Cityn e Tiranës me rezultat 2:1 në stadiumin në “Polud”, në ndeshjen e parë të rrethit të tretë të kualifikueseve në Conference League në futboll.

Legjenda e futbollit të Kosovës dhe Kroacisë, Ardian Kozniku, komentoi fitoren e Hajdukut dhe ngjarjet aktuale që lidhen me klubin. Ai foli për mediumin kroat “Index”.

“Kozniku është një nga të paktët që luajti me sukses për Hajdukun dhe Dinamon e Zagrebit, dhe në karrierën e tij të pasur ai fitoi edhe një medalje të bronztë në Kampionatin Botëror – France ’98, pra si pjesë e gjeneratës së famshme të ekipit kombëtar kroat.

Ai erdhi në Hajduk nga Prishtina në vitin 1990 dhe luajti 123 ndeshje duke shënuar 51 gola.

Tek Hajduku, ai ishte golashënuesi më i mirë i kampionatit të parë kroat. Nga viti 1994 deri në vitin 1998, ai luajti me sukses në Francë për Cannes-in, Le Havre-n dhe Bastia-n. Pas kësaj, ai u kthye në Kroaci dhe luajti për Dinamon dhe ishte pjesë e gjeneratës që luajti në Champions League dhe fitoi dy kampionate kroate.

Pas kësaj, ai luajti shkurt në Austri para se të përfundonte karrierën e tij në Hrvatski Dragovoljac. Ai aktualisht është asistent i Ante Mishes në Al-Salmiyya të Kuvajtit”, shkruan mediumi kroat.

Si e komentoni fitoren e Hajdukut?

Ardian Kozniku: Pamë futboll shumë të bukur. Hajduku fitoi me meritë në fund sepse krijoi shumë raste dhe mund të kishte shënuar më shumë gola, por futbolli është një lojë e tillë, nuk mund të shënosh gol nga çdo rast. Ekipi luajti me pjekuri dhe durim në një atmosferë fantastike që tifozët në Split e kanë krijuar prej vitesh.

Jam i lumtur që patëm mundësinë të shijonim një atmosferë të tillë futbolli. Dinamo dhe trajneri i tyre Ilir Daja duhen përgëzuar, ata u vendosën me guxim dhe luajtën në mënyrën më korrekte të mundshme ndaj favoritëve, por Hajduku ishte ende më i mirë.
Megjithatë, të jemi të kujdesshëm, kjo është vetëm ndeshja e parë dhe Hajduku do të duhet ta përfundojë punën në Shqipëri.

Më pëlqeu shumë loja e Filip Krovinoviq dhe jam i lumtur për asistim fenomenal që pati. Anësorët bënë një punë të shkëlqyeshëm, Bruno Durdov dhe Bamba që treguan përkushtim fantastik.

Çfarë prisni nga Ante Rebiç në Hajduk? Ai debutoi mbrëmë dhe luajti rreth njëzet minuta.

Ardian Kozniku: Ante Rebiç është një lojtar i nivelit të lartë dhe mbrëmë cilësia dhe dëshira e tij për të luajtur ishin të dukshme me paraqitjen e tij të shkurtër në fushë. Faktori kyç në çdo parashikim se çfarë mund të marrë Hajduku prej tij është shëndeti i tij.

Nëse shëndeti i tij i shërben, pres që ai të jetë një nga lojtarët më të mirë të Hajdukut që do të bëjë diferencën në fushë.

A mund të arrijë Hajduku në garat evropiane këtë verë për herë të parë që nga viti 2010 kur luajti në Europa League?

Ardian Kozniku: Faktori i fatit është gjithmonë vendimtar këtu. Nëse Hajduku kalon në Shqipëri, ata ndoshta do të luajnë kundër Jagiellonisë së Polonisë, e cila është një skuadër serioze.

Pres që tifozët të jenë aseti i veçantë i Hajdukut dhe lojtari i 12-të në luftën për Evropën. Hajduku është një klub vërtet i madh dhe ka një vend në garat evropiane, uroj me gjithë zemër që pas kaq shumë vitesh klubi të jetë në gjendje ta arrijë këtë qëllim.

Marko Livaja e ka drejtuar ekipin e Hajdukut për vite me radhë. Ai së shpejti do të mbushë 32 vjeç, sa gjatë mund të jetë lider në fushë?

Ardian Kozniku: Marko Livaja vlen vërtet më shumë se gjysma e ekipit.

Ai është një lojtar fenomenal që e ka vërtetuar këtë për një kohë shumë të gjatë. 32 vjet nuk janë treguesi kryesor në të gjithë historinë, ajo që është thelbësore është sa i shëndetshëm do të jetë. Deri më tani, ai ka treguar aftësinë. Nëse qëndron kështu, ai me siguri mund të luajë shkëlqyeshëm për disa vite të tjera.