Zjarr i madh në afërsi të Athinës, urdhërohen evakuime

Një person u gjet i vdekur sot pasdite në Atikën lindore, ku një zjarr i madh po shpërthen jashtë kontrollit dhe autoritetet kanë urdhëruar evakuimin e disa vendbanimeve në rrethinën e kryeqytetit Athinë.

Zëdhënësi i shërbimit zjarrfikës Vassilis Vathrakogiannis tha se zjarrfikësit zbuluan trupin e një burri të moshuar brenda shtëpisë së tij në Togani - Keratea, raportojnë mediat greke, përcjell kp.

Shërbimi zjarrfikës ka dyfishuar praninë në zonë, duke vendosur 190 zjarrfikës dhe 44 automjete tokësore, së bashku me vullnetarë të shumtë. Mbështetja ajrore përfshin 11 aeroplanë dhe 7 helikopterë.

Sipas shërbimit të zjarrfikësve, zona e prekur është banesore dhe përmban bimësi të përzier, duke përfshirë shkurre të ulëta dhe pisha.

Policia e trafikut ka mbyllur trafikun në rrugën rurale Keratea-Anavyssos për shkak të zjarrit dhe u bën thirrje shoferëve të dëgjojnë udhëzimet dhe të lehtësojnë kalimin e automjeteve zjarrfikëse.

Sekretariati i Përgjithshëm për Mbrojtjen Civile ka lëshuar një "alarm të kuq", kategoria e rrezikut 5, për një numër të zonave në Greqi për shkak të kushteve jashtëzakonisht të favorshme për shpërthimin dhe përhapjen e zjarreve.