Sulme të reja ruse në Ukrainë, goditet stacioni autobusëve dhe klinika universitare

Të paktën katër persona kanë humbur jetën dhe mbi 30 të tjerë janë plagosur në rajonin Kherson të Ukrainës jugore gjatë 24 orëve të fundit si pasojë e një vale të re sulmesh, tha të hënën guvernatori rajonal Oleksandr Prokudin.

Shërbimi lokal i emergjencave njoftoi për shkatërrimin e dy ndërtesave civile, disa automjeteve dhe shtëpive pranë vendit të sulmit.

Sipas Ivan Fedorov, kreut të administratës ushtarake të Zaporizhzhias, “një sulm ajror rus ka goditur sërish qytetin, duke rritur ndjeshëm shkallën e dëmtimeve. Po ashtu, një klinikë në Universitetin Mjekësor të Zaporizhzhias u qëllua teksa rreth 100 persona ndodheshin brenda saj, fatmirësisht nuk pati viktima, por dëmet kanë çuar në pezullimin e përkohshëm të shërbimeve mjekësore,” – u shpreh ai.

Nga ana tjetër e kufirit, autoritetet ruse raportuan disa viktima pas sulmeve ukrainase me dronë në rajonet e Tulas dhe Nizhny Novgorodit. Në Tula, dy persona u vranë dhe tre të tjerë u plagosën kur një objekt civil u godit nga shpërthimi i një droni.

Ministria ruse e Mbrojtjes tha se mbrojtja ajrore kishte rrëzuar 59 dronë ukrainas në rajonet ruse dhe se gjatë gjithë natës kishte kontroll të plotë mbi Krimenë.

Në qytetin e Zaporizhzhias, në Ukrainën juglindore, një bombë ajrore e drejtuar nga forcat ruse goditi stacionin qendror të autobusëve të dielën në mbrëmje, duke plagosur 20 persona dhe duke shkaktuar dëme të konsiderueshme në infrastrukturën civile.