Putin po përgatit “materiale historike” për takimin me Trump, Kievi: Synon të justifikojë pushtimin e Ukrainës duke e paraqitur si “shtet artificial”

Presidenti rus Vladimir Putin thuhet se po përgatit “materiale historike të veçanta” për takimin e tij të ardhshëm me presidentin amerikan Donald Trump, me qëllim justifikimin e agresionit ushtarak rus në Ukrainë.

Sipas Qendrës për Kundërshtimin e Dezinformimit pranë Këshillit të Sigurisë Kombëtare dhe Mbrojtjes së Ukrainës, këto materiale përfshijnë harta gjeografike dhe narrativa që synojnë ta paraqesin Ukrainën si një “shtet artificial”, i krijuar në kurriz të territoreve që dikur i përkisnin vendeve të tjera.

Kievi vlerëson se kjo është një strategji propagandistike e Kremlinit për të forcuar pretendimet territoriale ndaj Ukrainës dhe për të dhënë legjitimitet ndërkombëtar për agresionin ushtarak që vazhdon prej vitit 2022.

“Interpretime të tilla pseudo-historike janë pjesë e standardit të propagandës ruse, të cilën vetë Putin e ka përdorur shpesh në deklaratat e tij publike,” thuhet në deklaratën e Qendrës.

Institucioni ukrainas thekson se një qasje e tillë është e papranueshme dhe bie ndesh me të drejtën ndërkombëtare, e cila garanton integritetin territorial, paprekshmërinë e kufijve dhe ndalon përdorimin ose kërcënimin me forcë ndaj shteteve të tjera.

Qendra shton se “shumica e vendeve moderne, ose pjesë të tyre, dikur kanë qenë pjesë e shteteve të tjera”, duke përmendur edhe vetë Rusinë, e cila historikisht ka qenë pjesë e Hordhisë së Artë, ndërsa disa nga rajonet e saj aktuale dikur i përkisnin Gjermanisë, Suedisë apo Finlandës.

“Nuk ka asnjë ngjarje historike, e aq më pak ndonjë ndërtim pseudo-historik, që mund të shërbejë si bazë për pretendime territoriale apo për të justifikuar agresionin e armatosur ndaj shteteve të tjera,” përfundon deklarata e Qendrës për Kundërshtimin e Dezinformimit të Ukrainës.