Luis Enrique i shpëton ndëshkimit për goditjen me shuplakë të Joao Pedros

Luis Enrique pritet t’i shpëtojë çdo ndëshkimi për goditjen e hapur ndaj sulmuesit të Chelseat, Joao Pedro, pas finales së Kupës së Botës për Klube në SHBA, në korrik.

Trajneri i PSG-së goditi Pedron në fytyrë gjatë një përplasjeje në fund të ndeshjes, pasi Chelsea kishte fituar me rezultat 3-0.

Megjithatë, FIFA nuk ka nisur asnjë procedurë disiplinore ndaj tij.

Enrique ishte i pranishëm në stol për fitoren e PSG-së në Superkupën e UEFA-s kundër Tottenhamit, e cila përfundoi 2-2 në kohën e rregullt dhe 4-3 pas penalltive.

FIFA nuk ka komentuar mbi ndëshkimin e mundshëm, ndërsa fakti që ai u lejua të drejtonte skuadrën në finalen e Superkupës e bën edhe më pak të mundshme vendosjen e një sanksioni në të ardhmen.

Trajneri spanjoll tani është përqendruar në fillimin e një sezoni të ri në Ligue 1, pas suksesit historik të sezonit të kaluar, kur udhëhoqi PSG-në drejt fitimit të tripletës. /