Zelensky para takimit Trump-Putin: Mbështetemi te Amerika

“Po mbështetemi te Amerika”, tha presidenti ukrainas Volodymyr Zelensky.

Ai u deklarua përmes rrjeteve sociale pak pasi presidenti amerikan, Donald Trump u nis drejt Alaskës, ku do të takohet me homologun rus, Vladimir Putin.

Në deklaratën e re, Zelensky thotë se Kievi po forcon vijën e frontit rreth qytetit me rëndësi strategjike, Pokrovsk.

Ukrainasi thotë se pret të marrë sot një raport inteligjence mbi “qëllimet aktuale të palës ruse” dhe përgatitjet e Moskës për takimin në Alaskë.

“Me të vërtetë, bastet janë të larta”, thotë ai duke iu referuar mesazhit të mëparshëm në rrjetet sociale të Trumpit.

“Gjëja kryesore është që ky takim të hapë një rrugë të vërtetë drejt një paqeje të drejtë dhe një diskutimi substantiv midis liderëve në një format trilateral – Ukraina, Shtetet e Bashkuara dhe pala ruse. Është koha të përfundojë lufta, dhe hapat e nevojshëm duhet të ndërmerren nga Rusia. Ne po llogarisim te Amerika. Jemi të gatshëm, si gjithmonë, të punojmë sa më produktivisht të jetë e mundur”, shtoi ai.

Ndryshe, Trump dhe Putin do të takohen rreth 21:30, sipas kohës sonë lokale.