Kjo është pikërisht arsyeja pse Man United ka nevojë për Benjamin Seskon

Tifozët e Manchester United e pritën me entuziazëm Benjamin Seskon në “Old Trafford” gjatë fundjavës, vetëm disa orë pasi u konfirmua zyrtarisht transferimi i tij për 75 milionë euro.

Në ndeshjen kundër Fiorentinës, skuadra e Ruben Amorim luajti sërish pa një sulmues tipik, duke e vendosur befas Mason Mountin në majë të sulmit në vend të Rasmus Hojlundit, i cili nuk ishte në formë dhe mbeti i papërdorur.

“Djajtë e Kuq” e panë veten në disavantazh herët pas një gjysmë-voleji të Simon Solomon Junior Sohm nga një goditje këndi. Barazimi erdhi vetëm falë një autogoli, duke theksuar mungesën e mprehtësisë në repartin ofensiv.

Mungesa e një pike qendrore në sulm ishte e dukshme, sidomos me Joshua Zirkzee ende të dëmtuar dhe me të ardhmen e Hojlundit të pasigurt — faktorë që e bëjnë nënshkrimin e Sesko-s edhe më jetik.

Kapiteni Bruno Fernandes mori përsipër të udhëheqë sulmin, duke nxitur shokët e skuadrës të rrisnin ritmin dhe duke shënuar nga penalltia. Megjithatë, problemet në finalizim të Manchester United gjatë ndeshjeve parasezonale mbetën të dukshme.

Edhe lëndimet në mbrojtje dhe rotacioni i vazhdueshëm ndikuan negativisht, me Harry Maguire dhe Ayden Heaven që nisën së bashku ndeshjen, para se ky i fundit të detyrohej të largohej i dëmtuar.

Edhe pse “Djajtë e Kuq” fituan Kupën Snapdragon pas penalltive, kjo ndeshje shërbeu si një kujtesë se Sesko do të jetë vendimtar nëse duan të shmangin paraqitje të tjera të vakëta në sulm kur të nisë Liga Premier.