Barcelona me plan konkret

Barcelona po përgatitet të nënshkruajë Alessandro Bastonin nga Interi në afatin kalimtar të verës 2026, e cila do të ishte një nga marrëveshjet më të mëdha në futbollin evropian në vitet e fundit dhe një shtesë e nevojshme për katalunasit.

Zhoan Laporta, Deko dhe Hansi Flik bien dakord se mbrojtësi i Interit i përshtatet profilit që ata po kërkojnë pas largimit të Inigo Martinez në Arabinë Saudite për të luajtur për Al Nassr.

Në moshën 26-vjeçare, Bastoni e ka vendosur veten si një nga mbrojtësit më të mirë të Evropës.

Ai ka fituar dy tituj të Serie A dhe është paraqitur në dy finale të Ligës së Kampionëve me Interin, duke konfirmuar besueshmërinë e tij në skenën e madhe.

Pozicioni i tij si qendërmbrojtës me këmbë të majtë është veçanërisht tërheqës për Barcelonën, e cila i jep përparësi një lojtari me aftësi të mira në prodhimin e topit për t’iu bashkuar Pau Kubarsí-t në vitet e ardhshme.

“Ne kemi nevojë për ekuilibër në mbrojtje dhe Bastoni i plotëson kërkesat”, thuhet se u ka thënë Hansi Flik drejtorëve sportivë të klubit.

Përpara se të bëjë një lëvizje për italianin, Barcelona planifikon të lirojë hapësirë në skuadër. Emri i Ronald Arauhos duket të jetë një largim i mundshëm nëse ai nuk arrin të pozicionohet si titullar i rregullt këtë sezon. Plani i drejtorit sportiv është i qartë: të fitojë një shumë të konsiderueshme për një mbrojtës dhe të riinvestojë një pjesë të këtyre parave në nënshkrimin e Bastonit.