Objekti i panjohur në Poloni, prokurori: Mund të jetë dron ushtarak

Një hetim paraprak tregoi se objekti që shpërtheu pranë një fushe misri në Poloninë lindore ishte një dron ushtarak, njoftoi sot prokurori polak.

Polonia ka qenë në gatishmëri të lartë për kërcënimin e shkeljeve të hapësirës ajrore që kur një raketë ukrainase goditi fshatin Przewodów në vitin 2022, duke vrarë dy persona.

"Ekzaminimi i shpërthimit tregon se objekti ka shumë të ngjarë të jetë një dron ushtarak," tha prokurori rajonal i Lublinit Grzegorz Trusiewicz, duke shtuar se avioni ndoshta u dëmtua nga eksplozivët.

Një objekt i panjohur ra në territorin e Voivodeshipit të Lublinit dhe shpërtheu në rrethin Łuków në Poloninë lindore. Sipas informacioneve paraprake, askush nuk u lëndua në incident, raporton KosovaPress.

Policia polake njoftoi më parë se një objekt i paidentifikuar kishte rënë në një fushë në Osiny në lindje të provincës Lublin në kufi me Ukrainën.

Shpërthimi theu dritaret në disa shtëpi, por askush nuk u lëndua, raportoi agjencia polake e lajmeve PAP duke shtuar se policia gjeti metal dhe plastikë të djegur në vendin e aksidentit.