FIFA kërcënon me përjashtim Federatën Indiane të Futbollit

Federata Ndërkombëtare e Futbollit (FIFA) dhe Konfederata Aziatike e Futbollit (AFC) kanë paralajmëruar përjashtimin e Indisë nga të gjitha garat ndërkombëtare nëse Federata e saj e Futbollit (AIFF) nuk miraton statutin e ri brenda afatit të 30 tetorit.

Në një letër drejtuar presidentit të AIFF-it, Kalyan Chaubey, FIFA dhe AFC shprehën “shqetësimin e thellë” për vonesat e vazhdueshme në adoptimin e dokumentit, duke theksuar se mosrespektimi i afatit do t’i detyrojë të ndërmarrin masa disiplinore. “AIFF duhet ta konsiderojë këtë mesazh si detyrim të menjëhershëm për të ruajtur të drejtat e saj si anëtare e FIFA-s dhe AFC-së”, thuhet në deklaratë.

Çështja e statutit është e bllokuar që prej vitit 2017 në Gjykatën e Lartë të Indisë, ndërsa në vitin 2022 federata u pezullua për pak kohë pas ndërhyrjes së gjykatës, e cila emëroi një komitet të përkohshëm administrimi për shkak të akuzave për ndikime të paligjshme. Pezullimi u hoq vetëm disa ditë më vonë, kur u mbajtën zgjedhjet që sollën Chaubey-n në krye të federatës.

Kriza aktuale shpërthen ndërkohë që nisja e edicionit 2025/26 të Indian Super League është shtyrë për shkak të një mosmarrëveshjeje financiare mes federatës dhe menaxherit privat të kampionatit.

Nëse AIFF nuk miraton statutin e ri deri në tetor, India rrezikon të humbasë pjesëmarrjen në të gjitha aktivitetet ndërkombëtare të futbollit, duke përfshirë ekipin kombëtar dhe klubet e saj në garat aziatike.