Shpërthejnë mediat angleze ndaj Manchester Utd

Për herë të parë në historinë e saj, Manchester United është eliminuar nga një skuadër e kategorisë së katërt në Kupën e Ligës Angleze. Ekipi modest i Grimsby Town realizoi një nga surprizat më të mëdha të edicionit, duke fituar pas një maratone penalltish 12-11, pasi koha e rregullt përfundoi në barazim 2-2.

Rezultati është cilësuar si “një turp i madh” nga mediat britanike, të cilat theksojnë se pritshmëritë pas një vere me investime të mëdha janë shuar shumë shpejt. Pas humbjes 1-0 me Arsenal dhe barazimit 1-1 ndaj Fulham në Premier League, disfata në Kupë ka shtuar presionin mbi trajnerin Ruben Amorim.

“Një paraqitje gati groteske,” shkruan The Guardian, duke kujtuar se United ishte në disavantazh 0-2 pas vetëm 30 minutash, përpara se Bryan Mbeumo dhe Harry Maguire të barazonin shifrat. Humbja erdhi pas penalltive, ku protagonisti negativ ishte portieri Andre Onana.

The Telegraph e ka quajtur paraqitjen e ish-portierit të Interit “të turpshme”, duke e akuzuar se “të gjitha hedhjet ishin në drejtimin e gabuar”.

Edhe Daily Mail nuk kurseu kritikat, duke vënë theksin tek vlera e jashtëzakonshme e formacionit titullar, rreth 465 milionë euro, ndërkohë që “Grimsby e meritoi plotësisht fitoren”. Tabloidi britanik kujtoi gjithashtu se dy klubet nuk ishin përballur prej 77 vitesh, duke nënvizuar hendekun teorik mes tyre.

Ndërkohë, Manchester Evening News e përshkroi gjuhën e trupit të Amorimit si “atë të një trajneri tashmë të dënuar”, ndërsa disa tifozë kanë nisur të këndojnë këngë që kërkojnë largimin e menjëhershëm të tij.

“Djajtë e Kuq” do të përballen të shtunën në shtëpi me Burnley në Premier League, një ndeshje që pritet të jetë vendimtare për të ardhmen e Amorimit. Një tjetër humbje do të thellonte krizën që tashmë duket shumë e thellë në “Old Trafford".