Daja pas eliminimit të Dinamos: A jemi për titull kampion?

Dinamo u eliminua nga Play Off i Conference League pas barazimit 1-1 ndaj Jagiellonias, pasi ndeshja e parë përfundoi 3-0 në favor të polakëve.

Në përfundimin e këtij takimi, trajneri i dinamovitëve Ilir Daja doli në prononcim për mediat.

“Nuk kam asnjë peng, me të gjitha problematikat që kemi pasur ky ishte maksimumi ynë. Kemi probleme shumë  të mëdha në lëvizjen e lojtarëve për shkak të dëmtimeve që kemi.

Kemi bërë një rrugëtim shumë të mirë dhe historik për Dinamon. Me ato mungesa që kemi dhe me largimin e dy sulmuesve kryesorë, nuk mund t’i zëvendësojmë për një muaj. I përshëndes djemtë për rrugëtimin që bënë. Kemi dy ditë kohë që të marrim disa energji, do të mendohemi deri nesër. Nuk flas dot për kampionatin sepse jam i dënuar nga një gjyqtar tjetër.

A është Dinamo favorit për titullin kampion? Kampionati nuk ka filluar akoma, presim këto ditë për të bërë ndërhyrje në merkato, sepse na duhen lojtarë në mbrojtje dhe në sulm. Nuk mund të themi se çfarë do të bëjmë, nga vetë historia që ka Dinamo ka objektiva madhore. Më mirë t’i marrim gjërat me qetësi, të bëjmë zëvendësimet me ato lojtarë që kemi, të merremi me lojtarët e rinj që kemi. Rrugës pastaj do të shohim dhe se çfarë rrugëtimi do të kemi.

Është konstatim që është i vërtetë, ne nuk duhet të kishim ndërhyrje në këtë moment, por në janar. Dihej që Itodo dhe Zabërgja do të largoheshin. Ne duhet të kishim gjetur zëvendësuesin që në janar. Sot do të përballeshim denjësisht, pavarësisht se Jagiellonia e tregoi cilësinë në ndeshjen e parë. Do më vinte mirë që sot ta mbyllnim me fitore sepse iu afruam asaj gjëje. Por bëmë një rrugëtim të mirë me këtë kontigjent”, u shpreh Daja.