Newcastle, trajneri hap mundësinë e shitjes së Isak

Eddie Howe, trajneri i Newcastle, ka lënë të kuptohet për herë të parë se është i hapur ndaj një largimi të mundshëm të Alexander Isak.

Sulmuesi suedez, i cili kurrë nuk e ka fshehur pakënaqësinë e tij, iu ka komunikuar pronarëve të klubit të hënën e kaluar, gjatë një takimi privat, se nuk ka ndërmend të luajë më me fanellën e “Magpies”, edhe në rast se do të qëndronte pas mbylljes së merkatos verore.

Që nga ajo kohë, Howe nuk ka biseduar me Isak, pas deklaratës shpërthyese të lojtarit, ku denonconte premtime të pambajtura dhe humbje të besimit.

Trajneri ka mohuar se i ka garantuar ndonjëherë sulmuesit suedez mundësinë për ta lënë klubin.

Megjithatë, Newcastle ka punuar gjatë gjithë verës për alternativa që mund të mundësojnë shitjen e Isak te Liverpool. Ndërkohë, klubi është afër finalizimit të blerjes së sulmuesit gjerman Nick Woltemade, një operacion prej 65 milionë paundësh, shifër rekord për Newcastle. Burime të brendshme konfirmojnë se kampionët e Premier League mund të kthehen me një ofertë konkrete për suedezin, duke e vënë Newcastle përballë një zgjedhjeje të rëndësishme. Drejtuesit shpresojnë gjithashtu të angazhojnë një sulmues të dytë.

Gjatë konferencës për shtyp, Howe shpjegoi: “Sigurisht që kam një preferencë nga ana futbollistike, por duhet të merren parasysh të gjitha informacionet. Nuk mund të injorosh atë që ka ndodhur. Po përpiqem të qëndroj i distancuar, sepse nuk kam asnjë kontroll mbi situatën. Do ta lë gjithçka të ndjekë rrjedhën e vet dhe pastaj do të përballem me mundësinë e largimit të tij”.

Për menaxhimin emocional të situatës, Howe shtoi: “Nuk mund të përfshihesh emocionalisht, përndryshe merr vendime të gabuara. Duhet të ndahem nga situata, e bëra këtë që kur Alex u largua nga ekipi. Vendosa që prioriteti im të ishte grupi, të përqendrohesha plotësisht te lojtarët që kam në dispozicion. E dija se kjo situatë nuk do të zgjidhej shpejt, por unë nuk kisha fuqinë ta ndryshoja”.