Capello për shortin e Championsit: 4 skuadrat italiane mund të buzëqeshin

Ish-trajneri i Romës, Milanit dhe Juventusit, ndër të tjera, Fabio Capello, ka dhënë mendimin e tij për shortin e Ligës së Kampionëve të skuadrave italiane. Për “Gazzetta dello Sport”, ai u shpreh: “Interi, Napoli, Juventusi dhe Atalanta, mund të buzëqeshin, sepse mund të kishte shkuar shumë më keq. Shorti i Montecarlo ka qenë i ekuilibruar. Ky Champions është e arritshëm për skuadrat tona, të paraqitemi me 4 skuadra në 1/8 finale është e mundur”.

Për Interin shtoi: “Ka në grup dy skuadra jashtëzakonisht të forta nga Anglia, si Liverpool i Salah dhe Arsenal i Gyokeres, por konstatoj një avantazh të rëndësishëm; do t’i përballojë të dyja në ‘San Siro’.

Klubet e Premier League, jashtë fushës së tyre mund të performojnë më dobët në aspektin psikologjik. Chivu dhe të tijtë duhet të mendojnë se mund të përsërisin rrugëtimin e Champions-it, sezonin e kaluar. Zikaltrit mund ta kalojnë fazën e dytë duke hyrë nga dera kryesore e G8”.

Për Napolin: “Ashtu si Interi, edhe Napoli mund të synojë 1/8-at pa kaluar përmes ‘play off’-it. Shorti e ka vënë përpara një faze të parë me vështirësi mesatare, me përballje të forta dhe interesante.

De Bruyne kundër Manchester City të tij, Conte kundër Chelsea, me të cilin ka fituar Premier League, për të përmendur disa. Sidoqoftë, kampionët e Italisë janë ndërtuar për të luftuar si në Serie A, ashtu edhe në Champions. Trajneri Conte ka në dispozicion një skuadër të thellë dhe me cilësi të madhe, për t’i menaxhuar me ekuilibër dy kompeticionet njëherësh”.