Strategjia e Chelseat

Chelsea ka arritur marrëveshje me Manchester United për transferimin e Alejandro Garnacho-s kundrejt një shume prej 40 milionë paundësh. Sulmuesi i krahut, 21 vjeç, pjesë e kombëtares së Argjentinës, u informua nga trajneri Ruben Amorim në fund të sezonit të kaluar se duhej të gjente një skuadër të re.

Oferta fillestare e londinezëve ishte 25 milionë paundë, por pas negociatave palët ranë dakord për një shumë më të lartë, ndërsa United do të përfitojë edhe një klauzolë prej 10% nga shitja e ardhshme e lojtarit. Ky është transferimi i katërt më i madh në histori për klubin e “djajve të kuq”, pas largimeve të Cristiano Ronaldos, Romelu Lukakut dhe Angel Di Marias.

Klubi i drejtuar nga Todd Boehly dhe Clearlake Capital ka shpenzuar mbi 500 milionë paundë vetëm për lojtarë të krahut në pak më shumë se tre vjet. Duke llogaritur edhe sulmuesit, shpenzimet kalojnë shifrën 650 milionë paundës, por blutë e Londrës kanë kompensuar me shitje të mëdha lojtarësh.

Pikërisht këto shitje janë vendimtare këtë verë, për shkak të sanksioneve të UEFA-s që përfshijnë një gjobë prej 31 milionë eurosh dhe detyrimin për të ruajtur një “bilanc pozitiv” në merkato, në mënyrë që të regjistrojnë përforcimet për Ligën e Kampionëve.

Largimi i Christopher Nkunku drejt Milanit për 32 milionë paundë, si dhe mundësia që Nicolas Jackson të kalojë te Bayerni fillimisht në formë huazimi me detyrim blerjeje, e çojnë Chelsea-n drejt një rekordi të ri: mbi 263 milionë paundë të përfituara nga shitjet e kësaj vere, shifër rekord në Premier League.

Situata te Manchester United

Nga ana tjetër, Manchester United ka investuar rreth 200 milionë paundë për të rindërtuar repartin ofensiv, duke afruar emra si Benjamin Sesko, Matheus Cunha dhe Bryan Mbeumo. Garnacho, që iu bashkua akademisë së United në vitin 2020 nga Atletico Madrid, shihet si një shitje e rëndësishme edhe për të respektuar rregullat e Premier League mbi fitimin dhe qëndrueshmërinë financiare (PSR).

Argjentinasi luajti ndeshjen e tij të fundit me United në finalen e Europa League në maj, ku shprehu hapur pakënaqësinë për mosaktivizimin nga minuta e parë në humbjen 1-0 ndaj Tottenhamit. Pas këtij episodi, ai u përjashtua nga grumbullimet kryesore, duke u stërvitur veçmas bashkë me emra të tjerë si Jadon Sancho, Antony dhe Marcus Rashford (tashmë i huazuar te Barcelona).

Trajneri Ruben Amorim, i pyetur për të ardhmen e Garnacho-s gjatë turneut në SHBA, u përgjigj shkurt: “Ndonjëherë gjërat thjesht nuk funksionojnë”.