Luis Enrique: Donnarumma? Më mirë për të nëse gjen zgjidhje

Gianluigi Donnarumma vazhdon të stërvitet me Paris Saint-Germain në pritje të një largimi të mundshëm. Sot, në konferencë për shtypin, Luis Enrique u pyet për situatën e portierit italian dhe përgjigjja e tij ishte disi e sikletshme.

"Nuk e di, kjo varet nga merkatoja – tha Luis Enrique – nga lojtarët, nga agjentët, nga klubet e tjera. Ne vazhdojmë si gjithmonë. Shpresoj, sepse është më mirë për të nëse arrin të gjejë disa zgjidhje".

Trajneri i PSG-së shtoi gjithashtu: "Të mendosh të marrësh pesë apo gjashtë lojtarë çdo vit nuk është modeli im".

Deklaratat e tij vijnë pak ditë para fundit të merkatos (e hënë, 1 shtator, ora 20:00). Për kampionët e Europës, merkatoja e verës është përkthyer në vetëm tri afrime, edhe pse klubi ka arkëtuar rreth 200 milionë euro nga fitorja në Champions League dhe finalja e Botërorit të Klubeve.

Në fakt, PSG ka afruar vetëm mbrojtësin ukrainas Illia Zabarnyi, blerë nga Bournemouth-i për 63 milionë euro, si dhe portierët Lucas Chevalier dhe Renato Marin (i konsideruar në Brazil si "Alisson i ri").

"Të mendosh të marrësh pesë apo gjashtë lojtarë çdo vit nuk është modeli ynë – përsëriti Luis Enrique – po vendosim besimin tonë tek ata që kanë firmosur vitin e kaluar ose dy vite më parë, dhe tek të rinjtë".