Hipokrizi në Hungari – Orban i fton emigrantët të kthehen në atdhe ndërsa vajza i zhvendoset në SHBA

Rahel Orban raportohet se është pranuar në një universitet amerikan. Kompania e bashkëshortit të saj, BDPST Group, në pronësi të Istvan Tiborcz, konfirmoi se familja po zhvendoset për shkak të studimeve të saj.

Ajo kishte kohë që planifikonte të kthehej në SHBA, ku më parë kishte kaluar një semestër në Universitetin e Bostonit. Rahel ka deklaruar se dëshiron të fitojë njohuri dhe përvoja të reja për t’i sjellë më pas në atdhe.

Lajmi ka ngjallur debat, sidomos pasi kryeministri hungarez, Viktor Orbaqn ka bërë thirrje që diaspora hungareze të kthehet në vend, ndërkohë që partia e tij, Fidesz po humbet terren përballë partisë opozitare Tisza.

Më herët, Istvan Tiborcz – dhëndri i Orbanit – ka qenë në qendër të vëmendjes publike për shkak të rritjes së shpejtë të pasurisë së tij dhe lidhjeve me pushtetin.

Në një intervistë për Financial Times, ai mohoi të ketë përfituar nga lidhjet familjare, duke thënë se “unë jam biznesmen, jo politikan. U bëra interesant vetëm sepse jam dhëndri i kryeministrit”.

Zyra kundër mashtrimeve e Bashkimit Evropian kishte hetuar kompaninë Elios të Tiborczit, e cila kishte fituar kontrata të mëdha shtetërore për projekte infrastrukturore që përfshinin ndriçimin rrugor dhe transportin.

Sipas hetuesve, çmimet ishin rëndë të fryra dhe marrëveshjet mund të kishin përfshirë skema korruptive.