Mici: Çdo ndeshje që luhet ka presionin e vetë

Java e katërt në elitën e futbollit maqedonas servon përballjen Bashkimi – Struga Trim Lum në Kumanovë, aty ku pritet atmosferë e zjarrtë.

Gledi Mici, një futbollistë me përvojë dhe me një karrierë të bujshme, tashmë pjesë e Struga Trim, ka folur në prag të takimit të javës së katërt kundër Bashkimit.

Ndeshja do të zhvillohet në Kumanovë, qytet ky që në këto javë të para tregoi se sa e dashuron futbollin.

Prezenca dhe përkrahja e tyre pa dyshim se ka ndikuar edhe në rezultatet pozitive të skuadrës kumanovare, por vallë se si do ndikojë edhe sot ndaj skuadrës strugane.

“Çdo ndeshje që luhet ka presionin e vetë dhe kjo na takon ne si futbollista ta përballojmë se për këtë stërvitemi. Shpresoj të jenë sa më shumë tifozë në stadium e të bëhet një ndeshje e fortë.”

“Jemi përgatitur mjaft mirë gjatë gjithë javës, ku besoj se kemi pasur ditët e mjaftueshme për këtë përballje. Bashkimi ka bërë mirë në këtë fillim sezoni, po futbolli nuk luhet me frikë, ti kryejmë detyrat që kemi punuar gjatë gjithë javës e ta shijojmë si ndeshje.” – thotë Mici.

“Mendoj më shumë se është një ndeshje e rradhës me një skuadër të fortë pasi është akoma shpejt për të gjitha skuadrat. Shpresoj të vazhdojmë me fitore dhe lojë të mirë.”