Dobi pas barazimit me Partizanin: Mund të ishim më të zgjuar

Partizani dhe Teuta barazuan pa shumë histori. Sfida e zhvilluar në stadiumin “Arena e Demave”, përfundoi me shifrat 0-0. Në përfundim të këtij dueli foli trajneri i durrsakëve, Enkeleid Dobi.

“Normal që nuk e shohim Teutën për një muaj e gjysmë, atë ekip që presim të gjithë. Jemi në linjat e duhura, e pamë edhe sot. Ndoshta nuk ishim të kënaqur, por kishim personalitet. Jemi akoma në ndërtim, kemin ndryshuar gjysmën e ekipit. Do kohën e vet. Por jam krenar, pasi udhëzimet dhe koncepti i lojës në disa momente ishte i qartë, kemi luajtur 90 minuta presing.

Ky ishte një plus për ne. Po të kishim pak më shumë maturi... situatat nuk ishin të shumta. Por me zgjidhje më të zgjuara, mund të kërkonim diçka më shumë Zëvendësimet vonë? Ashtu ishte mendimi i stafit, sepse ekipi po funksiononte. Nuk ishte e nevojshme.

Profesor Edi Martinit i urojmë suksese. Por kjo lojë është koncepti ynë. Konceptet e çdo trajneri ndryshojnë, do zbatim të detyrave. Ne luajtëm me një sistem tjetër dhe nuk ka lidhje me Teutën e mëparshme dhe profesor Edin. Do të gjejmë një ekuilibër që të përshtatemi sa më mirë. Nuk do i tregoj sekretet që në ndeshjen e parë. Do shikoni një Teutë agresive që do të luajë futboll dhe që ka dinjitetin e vet.

Në çfarë faze është Teuta? Themelet i kemi hedhur, të presim avash avash. Të presim që të ngjisë betoni (qesh). Objektivi? Ndeshja e radhës. Po ndërtojmë ekip prestigjioz, do gjejë vend në Shqipëri dhe Europë”, tha Dobi.