Nga zgjedhja e Avdullahut te pritjet nga Kosova e Drita, Gjonbalaj analizon zhvillimet në futbollin e Kosovës

Profesori dhe analisti i futbollit, Malsor Gjonbalaj, ka folur gjerësisht për zhvillimet më të fundit në futbollin kosovar.

Në një intervistë për KosovaPress, ai ka komentuar vendimin e Leon Avdullahut për të zgjedhur Kosovën para Zvicrës, pritjet për ndeshjet e ardhshme të “Dardanëve” në kualifikimet për Botërorin 2026 dhe suksesin historik të Dritës në fazën e grupeve të Ligës së Konferencës.

Duke folur për Avdullahun, Gjonbalaj theksoi se mesfushori me vendimin e tij tregoi burrëri dhe karakter të fortë pasi nuk është e lehtë të refuzohet Zvicra për Kosovën.

Gjonbalaj: Duke zgjedhur Kosovën para Zvicrës, Leoni tregoi burrëri të lartë

“Sigurisht është një punë e përbashkët dhe duhet përgëzuar të gjithë ata të cilët kanë negociuar dhe kanë arritur ta sjellin Leonin tek ekipi ynë. Por, absolutisht unë jam kategorik, kam qenë gjithmonë e mbaj këtë qëndrojmë dhe nuk mendoj që do më thyejë dikush qëndrimin për sa i përket kësaj që them tani - secili futbollist shqiptar mendoj që e ka një obligim ti thotë po Kosovës ose Shqipërisë. Unë mendoj që do të duhej ata gjithsesi në radhë të parë ti zgjedhin ekipet tona dhe unë mendoj që Leoni ka treguar një burrëri të vërtetë në radhë të parë dhe një karakter të lartë që dëshmon edhe edukimin sigurisht të tij edhe familjar dhe mendoj që ka bërë një zgjedhje të duhur”, deklaroi Gjonbalaj.

Duke folur për pritjet ndaj Kombëtares së Kosovës, e cila në shtator ndeshjet e para kualifikuese për Botërorin 2026 ndaj Zvicrës dhe Suedisë, Gjonbalaj theksoi rëndësinë e përzgjedhjes së duhur të futbollistëve nga përzgjedhësi Franco Foda për të kërkuar rezultate pozitive në këto dy ndeshje.

Gjonbalaj: Kemi pritje të mëdha nga Kosova, Foda të bëjë përzgjedhjen e duhur

“Kosova është një ekip rreth së cilës ne gjithë mblidhemi edhe pa dyshim pritjet gjithmonë janë të mëdha. Është duke bërë një punë shumë serioze, me sa jam duke e përcjellë, është duke bërë edhe një evidentim i futbollistëve të ri, të cilët mund të ofrohen te ekipi jonë, futbollistët tonë, të cilët luajnë në skuadra të mëdha, janë në një formë të mirë. Tani po afrohen këto ndeshje, të cilat janë shumë të rëndësishme dhe sigurisht që përzgjedhësi i Kosovës duhet të jetë i prirë që të ketë në njëmbëdhjetëshin e parë futbollistë aktivë në klubet e tyre që janë në formën më të mirë dhe të cilët mund të japin maksimumin në lojë”, tha Gjonbalaj.

Gjonbalaj tutje ndalet edhe te grupi kualifikues i Kosovës, duke e cilësuar si shumë të fortë, por duke theksuar se “Dardanët” nuk janë aspak inferiorë ndaj rivalëve.

Gjonbalaj: Grupi shumë i fortë, Kosova nuk është aspak inferiore ndaj rivalëve

“Mendoj që kemi ekipe shumë të forta në grup, absolutisht konsideroj që janë skuadra shumë të forta taktikisht dhe mendoj që do të jetë shumë e vështirë. Sigurisht, starti është shumë i rëndësishëm, prandaj ndeshja e parë mund të jetë shumë problematike nëse ne nuk jemi të disiplinuar në fushën e lojës. Sido që të jetë, ekipi është pak a shumë i njëjti me ndryshime të vogla, por cilët janë ata të cilët do të jenë në njëmbëdhjetëshin e parë mendoj që do të duhej të varen nga forma e tyre, minutat që ata kanë në klubet ku luajnë...Unë mendoj që grupi i fortë, ekipet e forta duhet rritur mobilizimin tonë. Kjo është ideja dhe nuk do të thotë kjo që duhet të zbehet ose duhet të dorëzohet dikush, absolutisht, përkundrazi ne nuk jemi aspak inferiorë, ne jemi të fortë po ashtu”, tha Gjonbalaj.

Në lidhje me sfidën e parë kundër Zvicrës më 5 shtator, Gjonbalaj tha se Kosova e njeh mirë lojën e helvetikëve dhe duhet të synojë të paktën një pikë.

Gjonbalaj: Kosova e njeh lojën e Zvicrës, duhet kërkuar pikë

“Të luash tani në Zvicër me Zvicrën, kur mund të kesh edhe shumë tifozë shqiptarë atje nuk do të thotë që është një barrierë e patejkalueshme për sa i përket terrenit. Mund të bëhet barrierë e patejkalueshme për sa i përket cilësisë që e ka Zvicra. Sigurisht, pajtohem që ata nuk janë ndoshta në formën më të mirë, megjithatë Zvicra ka një skuadër kualitative, ka gjithmonë futbollistë të cilët dalin në sipërfaqe sepse edhe liga e tyre nuk është që është prej ligave më cilësore, por është një ligë shumë e organizuar dhe ka cilësi dhe mendoj që Zvicra ka një skuadër të papërshtatshme. Ne kemi luajtur me Zvicrën dhe sigurisht edhe tani mund të përsërisim të paktën, nëse jo fitoren bindëse si të paktën të nxjerrim ndonjë pikë, e cila do të na mundësonte që me Suedinë si vendas të kemi një shtytje më të madhe që të bëjmë diçka më tepër”, thotë Gjonbalaj.

Gjonbalaj foli edhe për suksesin historik të Dritës në Ligën e Konferencës, duke e cilësuar arritje jo vetëm për klubin gjilanas, por për tërë futbollin kosovar.

Gjonbalaj: Suksesi i Dritës është sukses i gjithë Kosovës

“Mendoj që është një punë e disavjeçare e skuadrës së Dritës dhe përpjekje të vazhdueshme për të arritur këtu ku janë sot. Pra, kjo është dhe një dëshmi, dhe është një shembull dhe për klubet tjera, të cilat ndonjëherë heqin dorë pas një kampionati ose dy nga ambiciet që i kanë. Nuk mundesh shumë lehtë për një vit të arrish në grupe të Konferencë Ligës ose të luash mirë në Evropë ose të bëhesh kampion patjetër...Rezultati është ai i cili na bind gjithëve që Drita ka punuar shumë mirë dhe mendoj që duhet ta përgëzojmë sepse të futesh në Konferencë Ligë nuk do të thotë sukses për Dritën, do të thotë sukses, edhe për Kosovën do të thotë perspektivë më e madhe për të gjithë futbollistët që luajnë aty, do të thotë pikë më e shumë për ligën tonë në përgjithësi, do të thotë transferime më e mëdha nga Liga e Kosovës, pra do të thotë shumëçka”, tha Gjonbalaj.

Në fazën grupore të Ligës së Konferencës, Drita do të ballafaqohet me skuadra të fuqishme si Az Alkmaar, Rayo Vallecano, Omonoia, Kuopio, Shkëndija dhe Shelbourne, dhe Gjonbalaj u shpreh optimist se kampioni i Kosovës mund të jetë befasia pozitive e këtij grupi.