E shtyu drejt trenit që ishte në lëvizje/ Zbulohet irakiani që vrau 16-vjeçaren ukrainase në Gjermani, duhej të ishte deportuar që në mars

Pas gati tre javësh nga ngjarja tragjike në stacionin e trenit Friedland, ku humbi jetën 16-vjeçarja ukrainase Liana K., është zbuluar se autor i dyshuar i vrasjes është një shtetas irakian 31-vjeçar, i cili duhej të ishte deportuar që në mars 2025, por qëndroi në Gjermani për shkak të mungesës së veprimit nga autoritetet e imigracionit.

Ngjarja ndodhi më 11 gusht, kur vajza dyshohet se u shty para një treni në lëvizje. Ajo kishte ardhur në Gjermani në vitin 2022 për t’i shpëtuar luftës në Ukrainë, së bashku me familjen e saj.

Gjykata e Qarkut të Hanoverit ka akuzuar publikisht autoritetet e imigracionit për neglizhencë të rëndë, duke theksuar se nuk ishte ndërmarrë asnjë veprim efektiv për ta larguar shtetasin irakian nga vendi, ndonëse kërkesa e tij për azil ishte refuzuar që në dhjetor 2024.

Vendim gjyqësor i refuzuar për shkak të dokumentacionit të paplotë

Sipas gjykatës, në korrik 2025 autoritetet kishin paraqitur një kërkesë për paraburgimin e tij në pritje të deportimit, por kërkesa u refuzua, pasi nuk ishte dokumentuar as rreziku i arratisjes, as një afat konkret për largimin. “Aplikimi kishte mangësi serioze”, thuhet në vendimin e gjykatës.

Gjithashtu, sipas hetimeve të deritanishme, policia kishte kontaktuar me të dyshuarin dy herë gjatë ditës së ngjarjes, por nuk e arrestoi. Madje, gjatë një prej këtyre kontakteve, ai ndodhej në gjendje të rëndë të dehur dhe u kishte treguar trupin e viktimës oficerëve. Vetëm tani është bërë e ditur se një ndërhyrje në një strehë refugjatësh atë mbrëmje ishte pikërisht për të.

Reagime dhe thirrje për transparencë

Ministrja e Brendshme e Saksonisë së Poshtme, Daniela Behrens, e cilësoi ngjarjen si një pasojë tragjike e problemeve serioze të sistemit të migracionit dhe procedurave të Dublinit. Ajo kërkoi hetim të plotë mbi dështimin për të realizuar transferimin e të dyshuarit dhe paralajmëroi që rasti të mos përdoret për të nxitur urrejtje dhe ksenofobi.

Ngjarja ka tronditur opinionin publik në Gjermani dhe ka ngritur pikëpyetje serioze mbi funksionimin e autoriteteve përkatëse dhe koordinimin midis gjykatës, policisë dhe shërbimeve të migracionit.