Sot super përballja Liverpool – Arsenal

Java e tretë e Premierligës sjell përballjen mes kampionit në fuqi Liverpool dhe nënkampionit të sezonit të kaluar, Arsenal, me të dyja skuadrat që do të vënë në lojë startin e tyre perfekt në këtë edicion.

Liverpool e nisi garën për titullin e dytë radhazi në elitë me fitore dramatike 4-2 ndaj Bournemouth dhe 3-2 ndaj Newcastle.

Në të dy rastet, “The Reds” arritën epërsi 2-0, por më pas u barazuan 2-2, duke pasur nevojë për heroizma në minutat e fundit për të siguruar tre pikët. Skuadra e Arne Slot do të dëshironte të shënojë sërish e para kundër Arsenalit, sidomos sepse një gol do ta bënte Liverpoolin të vendoste rekord klubi me 37 ndeshje radhazi duke shënuar në Premierligë.

Arsenali, nga ana tjetër, tregoi ambicien për titull me fitore pa pësuar gol ndaj Manchester United dhe Leeds. Pas shortit të vështirë në Ligën e Kampionëve, djemtë e Mikel Artetës do të kërkojnë të japin një mesazh të fortë me triumf në “Anfield”, diçka që do t’i lejonte “Topçinjtë” të fitonin tre ndeshjet e para të një sezoni të Premierligë për vetëm herën e dytë në 20 vitet e fundit.

Nëse mbajnë edhe një tjetër portë të paprekur, atëherë Arsenali do ta arrinte këtë për herë të parë që nga sezoni 1924/25.

Liverpool nuk ka arritur të fitojë asnjërën nga gjashtë përballjet e fundit në Premierligë kundër Arsenalit (4 barazime, 2 humbje), por në “Anfield” nuk ka humbur në ligë ndaj londinezëve që nga shtatori i vitit 2012 (7 fitore, 5 barazime që prej atëherë).