Milionat angleze sfidojnë strategjinë e Bayernit

Një ditë para ndeshjes së Bundesligës kundër Augsburg, drejtori sportiv i Bajernit të Mynihut, Kristof Frojnd foli për herë të parë mbi transferimin e afërt të Nik Voltemejd te Njukasëll Junajtid. Në fillim, ai tha thjesht: “Nuk dua të përfshihem në spekulime tani. Mendoj se po qarkullon një thashethem se ai do të largohet – por nuk e di se sa ka avancuar kjo punë.

Kjo nuk është tema jonë tani.” Por më pas Frojnd shtoi disa deklarata interesante: “Tregon diçka themelore fakti që sa shumë lojtarë të nivelit të lartë janë larguar nga Bundesliga gjermane drejt Premier Ligë gjatë dymbëdhjetë muajve të fundit – dhe gjithashtu shumat marramendëse që janë përfshirë.”

“Tregon që klubet në Premier Ligë kanë mundësi brutale. Jo vetëm dy ose tre, por shumë. Njukasëll është një klub i mirë, por nuk ka qenë në elitë vitet e fundit. Kjo tregon se sa shumë para qarkullojnë atje – është diçka tejet ekstreme.” Bajerni do të kishte qenë i gatshëm t’i paguante Shtutgartit një tarifë transferimi prej 55 milionë eurosh për yllin e kombëtares gjermane.

Për më tepër, agjencia e lojtarit do të kishte hequr dorë nga një komision prej rreth dhjetë përqind të shumës së transferimit. Por Shtutgart refuzoi, duke kërkuar të paktën 75 milionë. Kjo ishte shumë për bavarezët – por Njukasëll tani po paguan edhe më shumë! Interesant është fakti se trajneri Vinsent Kompani përsëriti mendimet e Frojnd dhe iu përgjigj pyetjes mbi atë që e bën ligën angleze kaq tërheqëse: “Paratë.

Mbaj mend kur u ngjita në Premier Ligë si trajner me Bërnli: papritur merr të ardhura nga TV prej 100 milionë – dhe kjo si një skuadër e sapongjitur. Për të tjerat është edhe më lart.”

“Si një klub i sapongjitur në Premier Ligë, ke një buxhet që mund të konkurrojë me 8 apo edhe 6 ekipet më të mira në Bundesliga. Si Bërnli, papritur konkuron me Frankfurtin ose Volfsburgun në tregun e transferimeve. Sanderlend, si një klub i sapongjitur, sapo bleu një lojtar nga Leverkuseni. Ky është realiteti financiar.”Drejtori sportiv Frojnd mbetet optimist pavarësisht dominimit në rritje financiar të klubeve angleze. Austriaku thotë:

“Bajerni është një klub i madh dhe shumë tërheqës. Lojtarët ndihen shumë mirë këtu. Ata mund të fitojnë trofe këtu. Ne mund tu ofrojmë atyre mundësi shumë interesante si në nivel kombëtar, ashtu edhe ndërkombëtar.”