Kremlini akuzon Evropën: Disa vende po pengojnë përpjekjet e Donald Trump për paqe në Ukrainë

Moska ka akuzuar zyrtarisht disa vende evropiane se po bllokojnë iniciativat e presidentit amerikan, Donald Trump, për të ndërmjetësuar një zgjidhje paqësore në luftën mes Rusisë dhe Ukrainës.

Zëdhënësi i Kremlinit, Dmitry Peskov, deklaroi të dielën se përpjekjet për t’i dhënë fund konfliktit po pengohen nga ajo që e cilësoi si “partia evropiane e luftës”.

“Evropa po pengon përpjekjet e përbashkëta mes SHBA-ve dhe Rusisë për t’i dhënë fund luftës në Ukrainë. Deri më tani, nuk kemi parë asnjë sinjal serioz nga Kievi që tregon gatishmëri për paqe. Prandaj, ne do të vazhdojmë operacionin tonë ushtarak derisa të ndryshojë kjo situatë”, u shpreh Peskov për mediat ruse.

Deklaratat e Kremlinit pasojnë një raport të publikuar nga portali amerikan Axios, i cili citon burime nga Shtëpia e Bardhë që shprehen të zhgënjyer me sjelljen e disa liderëve evropianë, të cilët, sipas tyre, në publik mbështesin paqen, por në prapaskenë punojnë për ta sabotuar atë.

Raporti thekson gjithashtu se administrata Trump po shqyrton mundësinë e vendosjes së sanksioneve ndaj vendeve evropiane, në rast se nuk bashkëpunojnë për një zgjidhje paqësore dhe fleksibël në konfliktin Ukrainë-Rusi.