Von der Leyen dhe Tusk në kufirin me Bjellorusinë pavarësisht paralajmërimit për ushtarët

Presidentja e Komisionit Evropian Ursula von der Leyen dhe kryeministri polak Donald Tusk vizituan kufirin polako-bjellorus, pavarësisht një paralajmërimi sigurie për shfaqjen e ushtarëve të armatosur bjellorusë aty pranë.

Tusk zbuloi gjatë një deklarate të përbashkët për shtyp se gjatë rrugës për në vendin e konferencës, ata morën një rekomandim nga shërbimi i sigurisë për ta anuluar ose zhvendosur atë për shkak të shfaqjes së papritur të "ushtarëve bjellorusë me pushkë", shkruan European Justice, përcjell KosovaPress.

"E pyeta presidenten se çfarë mendonte për këtë. A është e gatshme të merr pjesë në konferencë, në këtë vend? Dhe dëgjova fjalët që doja të dëgjoja, dhe për ne këtu në Poloni ato ishin të qarta: asnjë lëshim, askush nuk do të na frikësojë ose shqetësojë këtu. Ne jemi gjithashtu këtu për të treguar këtë vendosmëri të vërtetë evropiane", tha Tusk.

Von der Leyen theksoi se kishte ardhur për të shprehur solidaritetin e plotë të Evropës me Poloninë si një vend në vijën e parë të mbrojtjes.

"Për shumë vite, ju dhe polakët jeni përballur me sulme hibride të synuara dhe cinike. Do të doja të theksoja se Evropa qëndron me ju në të gjitha rastet e mundshme", tha ajo.

Në pikën kufitare Krynkami, Tusk dhe von der Leyen morën pjesë në një takim informues me komandantët e Rojës Kufitare dhe ushtrisë. Pas takimit, Tusk dhe von der Leyen vizituan vendin ku ruhen elementët për ndërtimin e "Mburojës Lindore" dhe gardhit kufitar të modernizuar.

Përveç mbrojtjes dhe sigurisë, tema e diskutimit ishte programi i huadhënies preferenciale SAFE, çelësi i planit të riarmatimit të Evropës në përgjigje të potencialit ushtarak në rritje të Rusisë.