Milan dhe Roma bëjnë një shkëmbim të bujshëm

Gazetari italian, Fabrizio Romano ka konfirmuar se Santiago Gimenez ka dhënë miratimin për t’u transferuar te Roma, si pjesë e marrëveshjes së shkëmbimit me Artem Dovbyk, që pritet të kalojë te Milan.

Sulmuesi meksikan, i cili u transferua nga Feyenoord te kuqezinjtë gjatë merkatos së janarit, nuk ka arritur të përshtatet në Milano dhe situata e tij është përkeqësuar me ardhjen e trajnerit Massimiliano Allegri, i cili kërkon një profil tjetër për repartin ofensiv.

Edhe pse fillimisht dëshironte të qëndronte te Milan, Gimenez ka pranuar vendimin e klubit për ta përfshirë në këtë operacion.

Nga ana tjetër, Dovbyk e kishte dhënë prej kohësh “po”-në e tij për një kalim në “San Siro”.

Tani, palët po punojnë për të finalizuar detajet ekonomike, me zyrtarizimin e shkëmbimit që pritet të ndodhë brenda orëve të fundit të merkatos.