Vora fitore historike në Superiore

Vora ka arritur fitoren e parë në historinë e saj në Kategorinë Superiore, duke triumfuar 3-1 ndaj Tiranës në ndeshjen e dytë të sezonit.

Skuadra e drejtuar nga Arjan Bellai e nisi sfidën me presion të lartë dhe në minutën e 34-të fitoi një penallti pas prekjes me dorë në zonë nga Rafa. Bernard Karrica, afrimi më i ri i verës, u tregua i saktë nga pika e bardhë, duke mbyllur pjesën e parë me avantazhin 1-0.

Në fillim të pjesës së dytë, kombinimi i bukur Vrapi-Karrica çoi në golin e dytë të ish-sulmuesit të Shpresave, ndërsa në minutën e 68-të, pas një aksioni të shpejtë mes Karricës dhe Bardhit, mbrojtësi Zuna realizoi golin e tretë me një goditje të saktë jashtë zonës.

Tirana reagoi pesë minuta nga fundi me një ekzekutim perfekt të goditjes së dënimit nga Eliton, por nuk mundi të shmangte humbjen e parë të sezonit.