28 vite pa motrën! Charles Spencer vendos lule në vendin ku prehet Princeshë Diana, postimi emocionues në rrjetet sociale

Charles Spencer, vëllai i Princeshës së ndjerë Diana, kujton motrën e tij në 28-vjetorin e ndarjes tragjike nga jeta.

Në një postim në Instagram, 61-vjeçari, publikoi një fotografi të një buqete me trëndafila të bardhë dhe rozë, lule të mbledhura nga kopshti i  Althorp, ku Diana prehet që nga viti 1997.

“Lulet që i këputëm këtë mëngjes nga kopshtet e Althorpit për Ishullin”, shkroi ai krahas fotove, duke iu referuar varrit të saj në ishullin privat brenda pronës familjare. “Gjithmonë një ditë e pamundur”, shtoi ai me dhimbje.

Princesha Diana humbi jetën më 31 gusht të vitit 1997, në një aksident tragjik automobilistik në Paris, së bashku me partnerin e saj Dodi Fayed dhe shoferin Henri Paul. Ajo la pas dy djem, Princin William, atëherë 15 vjeç, dhe Princin Harry, 12 vjeç.

Vendi ku do të prehej u zgjodh pikërisht nga Charles Spencer, me dëshirën që Diana të prehej në një hapësirë të sigurt, ku djemtë e saj të mund të vinin në qetësi, larg vëmendjes publike

Edhe pse varri i saj në ishull nuk është i hapur për publikun, adhuruesit mund të nderojnë kujtimin e saj pranë memorialit të ndërtuar në kopshtet e Althorp-it, i ngritur në korrik të vitit 1998, një vend simbolik që mban gjallë kujtimin e një gruaje që mbeti në memorien e shumë njerëzve si “Princesha e Zemrave”.