Shumica e ukrainasve mbështesin “armëpushimin” me Rusinë, por vetëm me garanci të forte nga Perëndimi

Një shumicë e madhe e qytetarëve ukrainas mbështet idenë e një armëpushimi me Rusinë, por vetëm nëse sigurohen garanci të qarta sigurie nga SHBA dhe Europa. Ky është përfundimi i një anketimi të realizuar nga Ukrainian Rating Group, në të cilin morën pjesë 1.600 persona, nga data 21 deri më 23 gusht.

Sipas sondazhit, 75% e të anketuarve e konsiderojnë të domosdoshme ofrimin e garancive ndërkombëtare të sigurisë si parakusht për ndalimin e luftimeve, në mënyrë që të parandalohet një sulm tjetër rus në të ardhmen.

Ndërkohë që Presidenti i SHBA-së, Donald Trump, ka rritur përpjekjet për të nxitur bisedime për armëpushim, vetë ukrainasit shprehen të hapur për negociata, por me ndërmjetësim ndërkombëtar: 82% besojnë se negociatat janë një rrugë realiste për paqe, ndërsa 62% kërkojnë përfshirjen e vendeve të treta për të arritur një kompromis. Vetëm 20% janë pro negociatave të drejtpërdrejta me Rusinë.

Sa i përket qëndrimeve ndaj kompromisit:

59% mbështesin ndalimin e luftës dhe arritjen e një marrëveshjeje;

20% duan që lufta të vazhdojë deri në rimarrjen e Donbasit dhe Krimesë;

Vetëm 13% do të pranonin një paqe që nuk përfshin rikthimin e Krimesë dhe Donbasit.

Këto gjetje tregojnë se shoqëria ukrainase po kërkon një zgjidhje paqësore, por jo me çdo çmim – siguria afatgjatë dhe garancitë ndërkombëtare janë vendimtare për çdo marrëveshje me Rusinë.