Andre Onana transferohet në Turqi në formë huazimi

Andre Onana mund të jetë në prag të largimit nga Manchester United, pasi sipas raportimeve klubi ka arritur një marrëveshje për ta dërguar atë në huazim.

Portieri 29-vjeçar ka qenë në stol në dy ndeshjet e fundit të Premier League dhe duket se ka humbur besimin e trajnerit Ruben Amorim.

Sipas Fabrizio Romanos, United ka arritur një marrëveshje verbale për huazimin e kamerunasit te klubi turk Trabzonspor. Megjithatë, largimi i tij ende nuk është zyrtar, pasi fjala e fundit i takon vetë Onanës për të vendosur nëse do të pranojë apo jo.

Onana ka qenë i lidhur me një largim gjatë gjithë verës dhe është përballur me kritika të shumta që nga transferimi i tij prej 47 milionë funtesh nga Interi në vitin 2023. Gabimet e shumta në ndeshje të rëndësishme kanë vënë në dyshim vendin e tij titullar në Old Trafford.

Trajneri Amorim ka zgjedhur Altay Bayindir si portier titullar në tri ndeshjet e para të kampionatit, ndërsa Onana ka luajtur vetëm në disfaten e rëndë të United në Carabao Cup kundër skuadrës së League Two, Grimsby.

Lajmi për largimin e mundshëm të Onanës vjen pak pas afrimit të një portieri të ri në afatin kalimtar të verës. Belgjiku Senne Lammens iu bashkua United nga Royal Antwerp në ditën e fundit të merkatos për 18.2 milionë funte.

Lammens tashmë i bashkohet një grupi të ngjeshur portierësh në “Theatre of Dreams”, ku janë gjithashtu Onana, Bayindir dhe Heaton.

Duke folur në prezantimin e tij, Lammens u shpreh:

“Jam jashtëzakonisht krenar që i jam bashkuar Manchester United, është një ëndërr e bërë realitet. Vitet e fundit kanë qenë një udhëtim i jashtëzakonshëm që tani ka përfunduar në një destinacion të pabesueshëm dhe shpresoj të jetë fillimi i diçkaje të veçantë.

Ndjehet atmosfera pozitive që po krijohet këtu dhe e di se mund të jap një ndikim të vërtetë në klub në vitet e ardhshme. Mezi pres të njihem me shokët e skuadrës dhe të nis punën me Ruben dhe stafin teknik.

Ky është vendi perfekt për t’u zhvilluar, për të ecur përpara me këtë ekip emocionues dhe për të arritur objektivat e mia në karrierë”.