“Po merrnin pensionet”/ Thellohet bilanci i sulmit rus në Ukrainë, shkon në 23 numri i të vdekurve

Ka shkuar në 23 numri i viktimave nga një sulm ajror rus në një fshat në Ukrainën lindore.

BBC shkruan se viktimat ishin njerëz të zakonshëm që merrnin pensionet e tyre në vendbanimin Yarova të Donetskut, tha Presidenti Volodymr Zelensky. Udhëheqësi rajonal i Donetskut Vadym Filashkin tha se shërbimet e emergjencës ishin në vendngjarje dhe po aq njerëz u plagosën sa u vranë.

Yarova ndodhet në veri të Slovyansk, një nga qytetet e mëdha në rajon, dhe jo shumë larg vijës së frontit, ndërsa forcat ruse përparojnë ngadalë në lindje.

Nëse konfirmohet, numri i të vdekurve do të jetë ndër sulmet më të rënda ndaj civilëve ukrainas në javët e fundit, 42 muaj pas pushtimit në shkallë të plotë të Rusisë.

23 persona u vranë në sulmet ajrore gjatë natës në kryeqytetin e Ukrainës, Kiev, në fund të gushtit.

Në fundjavë, Rusia nisi sulmin e saj më të madh ajror ndaj Kievit deri më tani, duke goditur ndërtesën kryesore qeveritare në kryeqytet, në atë që Zelensky e quajti një sulm “të pamëshirshëm” që synonte zgjatjen e luftës.

Duke postuar në internet pamje të sulmit në Yarova, Zelensky tha se nuk kishte “fjalë” për të përshkruar sulmet e fundit ruse.

“Bota nuk duhet të heshtë”, tha Zelensky, duke kërkuar një përgjigje si nga SHBA-ja, Evropa ashtu edhe nga grupi i kombeve G20.