Vizitë e papritur e Princit Harry në Kiev: Premton mbështetje për të plagosurit

Princi Harry ka realizuar një vizitë të papritur në Kiev me ftesë të qeverisë ukrainase, duke thënë se dëshiron të bëjë “çdo gjë të mundshme” për të ndihmuar rikuperimin e mijëra ushtarëve që janë plagosur rëndë gjatë luftës trevjeçare kundër Rusisë.

Gjatë vizitës në kryeqytetin ukrainas, ai dhe një ekip nga Fondacioni i Lojërave Invictus pritet të prezantojnë nisma të reja për të mbështetur rehabilitimin e të plagosurve, me synimin përfundimtar që ndihma të shtrihet në të gjitha rajonet e vendit.

Më herët këtë vit është vlerësuar se lufta në Ukrainë tashmë ka lënë mbi 130.000 persona me aftësi të përhershme të kufizuara – dhe qeveria e ka vendosur rehabilitimin përmes sportit në qendër të politikave të saj për mbështetjen e veteranëve.

Duka i Sussex-it, duke folur për The Guardian gjatë një udhëtimi me tren gjatë natës drejt kryeqytetit, tha: Ne nuk mund ta ndalim luftën, por ajo që mund të bëjmë është të bëjmë gjithçka për të ndihmuar procesin e rikuperimit.

Ai shtoi se “mund të vazhdojmë t’i ndihmojmë njerëzit e përfshirë në këtë luftë dhe atë që ata po kalojnë. Duhet ta mbajmë këtë në mendjet e njerëzve”..

“Shpresoj që kjo vizitë të ndihmojë që njerëzit ta ndiejnë më afër realitetin, sepse është e lehtë të bëhesh i pandjeshëm ndaj asaj që po ndodh”, shtoi ai.