Rënia e Vinicius Jr - nga favorit për "Topin e Artë" te vendi i 16-

Vetëm një vit më parë, Vinicius Junior ishte në kulmin e karrierës së tij. Braziliani, lojtari kryesor i Real Madridit fitues të La Ligës dhe Ligës së Kampionëve, shihej si favorit absolut për Topin e Artë 2024.

Madje, zhgënjimi ishte aq i madh kur çmimi iu dha Rodrit, saqë as ai e as klubi nuk morën pjesë në galanë e Parisit – një gjest i fortë simbolik që tregonte se e ndjente se momenti i tij po i shpëtonte nga duart.

Një vit më vonë, realiteti është krejt ndryshe. Në edicionin e vitit 2025, Vinicius renditet vetëm i 16-ti, një rënie e ndjeshme që pasqyron formën e tij në fushë dhe pikën e kthesës në karrierë.

Nën drejtimin e Carlo Ancelottit, Vini ishte i paprekshëm dhe qendra e projektit madrilen. Por ardhja e Xabi Alonsos ka sjellë ndryshim. Trajneri i ri e ka orientuar skuadrën drejt një strukture më kolektive, ku roli i brazilianit është i rëndësishëm, por jo më jetësor.

Shfaqja e Kylian Mbappes s ka bërë që Vinicius të humbasë peshën kryesore, pasi francezi shënon më shumë, merr më shumë vëmendje dhe dominon narrativën mediatike.

Vinicius e di se viti 2024 ishte momenti i tij i artë. Një triumf që do ta kishte kurorëzuar karrierën, por që tani duket gjithnjë e më larg. Me Mbappe si shok skuadre dhe rival i brendshëm, shanset e tij janë reduktuar ndjeshëm.

E vetmja mënyrë për ta rikthyer emrin e tij mes favoritëve është një ndryshim i madh në ritmin e lojës, i kombinuar me një rol vendimtar në Kupën e Botës 2026. Përndryshe, ëndrra e Topit të Artë do të mbetet një shans i humbur.