Sulmi me `ransomware` shkakton ndërprerje në aeroportet evropiane

Aeroportet në Evropë u përballën ditët e fundit me ndërprerje të sistemit automat të check-in-it për shkak të një sulmi me ransomware, ka konfirmuar të hënën agjencia e BE-së për sigurinë kibernetike ENISA, duke theksuar rreziqet në rritje që këto sulme paraqesin për infrastrukturën kritike dhe industrinë.

Disa nga aeroportet më të mëdha, përfshirë Brukselin dhe Londrën Heathrow, vazhduan të përballeshin me ndërprerje të hënën, pasi hakerët çaktivizuan sistemet e check-in-it të ofruara nga Collins Aerospace, pjesë e RTX, duke prekur dhjetëra fluturime dhe mijëra pasagjerë që nga e premta, raporton Reuters.

“Forcat e zbatimit të ligjit janë të përfshira për të hetuar” softuerin keqdashës që bllokon të dhënat derisa viktima paguan për të rikthyer qasjen, tha agjencia ENISA, pa treguar origjinën e sulmit.

Sulmet kibernetike kanë prekur edhe qeveri dhe kompani muajt e fundit, përfshirë prodhuesin e makinave luksoze Jaguar Land Rover, i cili u detyrua të ndalonte prodhimin si pasojë.

Rafe Pilling, drejtor i inteligjencës së kërcënimeve në firmën britanike Sophos, tha se sulmet ransomware zakonisht synojnë viktima më të njohura për shkak të vëmendjes që sjellin, por frekuenca e tyre nuk është rritur.

Një sondazh i kryer tek rreth 1,000 kompani nga grupi gjerman Bitkom tregoi se ransomware ishte forma më e zakonshme e sulmit kibernetik, me një në shtatë kompani që kanë paguar shpërblim.

Collins Aerospace po punon me aeroportet e prekur për të rikthyer funksionalitetin e plotë. Zëdhënësi i Heathrow tha se linjat ajrore kanë implementuar masa alternative ndërsa kompania punon për zgjidhjen e problemit.

Në Berlin, ku numri i pasagjerëve ishte më i lartë për shkak të Maratonës, sistemet e check-in-it ende nuk ishin rikthyer dhe nisjet u vonuan mbi një orë. Aeroporti i Brukselit përdorte iPad dhe laptopë për regjistrimin e pasagjerëve, me 60 fluturime të anuluara nga 550. Të dhënat nga firma Cirium treguan se vetëm 42% e fluturimeve nisën brenda një ore nga koha e planifikuar.

Aeroporti i Dublin-it raportoi ndikim minimal dhe kishte disa procese manuale në përdorim.