Flick siguron: Kam folur me Yamal, dëshiron Topin e Artë në vitin 2026

Ceremonia e Topit të Artë ka mbaruar dhe trofeu personal i lakmuar për lojtarin më të mirë të vitit 2025 shkoi për Dembélé. Lamine Yamal përfundoi menjëherë pas tij në vendin e dytë, një fakt që u përmend nga Hansi Flick, trajneri i tij te Barcelona.

Duke folur në një konferencë për shtyp përpara ndeshjes kundër Oviedos, trajneri gjerman deklaroi: “Fola me të dje dhe ai është i motivuar për të fituar Topin e Artë vitin e ardhshëm, pasi nuk e mori këtë vit”.

Më pas ai shtoi: “Edhe Dembélé e meritonte. Ai e pranon dhe është i motivuar. Do të ketë një shans për ta fituar. E vlerësoj që shumë nga skuadra jonë ishin në garë, kjo tregon shumë për atë që bëmë sezonin e kaluar”.

Gazetarët e pranishëm në sallën e shtypit, megjithatë, këmbëngulën në objektivin e spanjollit 18-vjeçar për vitin 2026, dhe Flick u përgjigj:

“Nuk më pëlqejnë veçanërisht këto gjëra, por është pjesë e punës sime. Ishte e rëndësishme për klubin, kështu që shkova me të tjerët (në ceremoninë e Topit të Artë). Fola me disa personalitete, më pëlqeu të bisedoja me njerëz që na thanë se e vlerësojnë mënyrën tonë të të luajturit”.

Më pas ai përfundoi: “Duhet të kesh besim në atë që po bën skuadra. Jam shumë krenar për skuadrën time. Është e rëndësishme që trajnerët, klubi dhe tifozët të jenë të kënaqur”.

Megjithatë, Yamal do të jetë jashtë ndeshjes kundër Oviedos, pasi nuk është rikuperuar plotësisht nga dëmtimi që pësoi gjatë kohës që luante për kombëtaren:

“Ai e kupton kur duhet të pushojë. Jo vetëm ai, por edhe Pedri… dhe të tjerët gjithashtu. Jam shumë i kënaqur.

Nuk mendoj se kush mungon, por kush është i disponueshëm. Përqendrohem te ata që kam, jo ​​te ata që nuk janë. Lojtari duhet të ndiejë se besoj te të gjithë. Jam i lumtur me skuadrën time. Kur fillojmë çdo ndeshje, çdo njëmbëdhjetëshe mund të fitojë”.