Barcelona gëzohet që Raphinha nuk e fitoi ‘Topin e Artë’

Barcelona ka shmangur pagesën e 11 milionë eurove ndaj Leeds United, pasi Raphinha nuk arriti të fitonte “Topin e Artë” për vitin 2025.

Braziliani pati një sezon të jashtëzakonshëm me katalanasit, duke shënuar 34 gola dhe dhënë 22 asiste, dhe madje u shpall “Lojtari i Vitit” në La Liga.

Megjithatë, ai përfundoi i pesti në renditjen përfundimtare të “Topit të Artë”, ndërsa çmimin e fitoi sulmuesi i PSG-së, Ousmane Dembele, pas një triplete historike.

Kur Raphinha iu bashkua Barcelonës nga Leeds në vitin 2022, marrëveshja përfshinte disa bonuse, përfshirë një klauzolë që i garantonte Leeds 11 milionë euro nëse sulmuesi fitonte ndonjëherë “Topin e Artë”.

Kjo klauzolë mbetet aktive ndërsa ai luan për Barcelonën, së bashku me një bonus tjetër prej 11 milionë eurosh në rast se klubi fiton Ligën e Kampionëve me të në skuadër.

Megjithatë, pavarësisht se Leeds nuk përfitoi këtë pagesë tani, klubi mund të përfitojë ende në të ardhmen, nëse Raphinha ruan formën e tij të shkëlqyer.

Në moshën 28-vjeç, ai mbetet në kulmin e karrierës dhe ka kontribuar tashmë në gola këtë sezon.

Raphinha përballet me konkurrencë të fortë për “Topin e Artë” këtë vit, duke përfshirë shokun e skuadrës Lamine Yamal, Kylian Mbappe dhe madje edhe Pedri.