Tentuan të kalojnë kanalin për në Angli me gomone, mbyten 2 gra

Dy gra kanë humbur jetën gjatë një përpjekjeje për të kaluar Kanalin Anglez me një gomone të improvizuar të shtunën në mëngjes. Incidenti ndodhi në brigjet e Francës veriore, ku rreth 100 persona u nisën drejt Mbretërisë së Bashkuar, raporton The Guardian.

Gjashtëdhjetë persona u shpëtuan dhe po marrin kujdes nga mbrojtja civile, ndërsa një çift dhe fëmija i tyre, që vuante nga hipotermi e moderuar, u dërguan urgjent në spitalin në Boulogne. Sipas gazetës franceze La Voix Du Nord, dy viktimat ishin gra somaleze.

Përpjekja e fundit vjen në një vit ku më shumë se 30,000 njerëz kanë mbërritur në Mbretërinë e Bashkuar me varka të vogla, ndërsa që nga korriku 2024, kur Partia Laburiste erdhi në pushtet, mbi 50,000 persona kanë kaluar në këtë mënyrë.

Qeveria britanike ndodhet nën presion për shkak të rritjes së numrit të kalimeve me anije të vogla dhe të aplikimeve për azil.