Gazetari ukrainas Maksym Butkevych merr çmimin “Vaclav Havel”

Gazetari dhe aktivisti i të drejtave të njeriut, ukrainasi Maksym Butkevych mori sot çmimin prestigjioz për të drejtat e njeriut “Vaclav Havel”, i dhënë nga Këshilli i Evropës.

“Guxoj të them se marr pjesë në këtë ceremoni dhe e marr këtë çmim të nderuar jo vetëm në cilësinë time personale, por edhe në emër të të burgosurve të luftës dhe civilëve të ndaluar ilegalisht nga Rusia”, tha Butkevych në ceremoninë e ndarjes së çmimeve në qytetin francez të Strasburgut.

Butkevych është bashkëthemelues i qendrës për të drejtat e njeriut “Zmina” dhe radios “Hromadske”.

Në fillim të pushtimit të plotë të Ukrainës nga Rusia, ai u ofrua vullnetar për shërbim në ushtrinë ukrainase pavarësisht bindjeve të tij pacifiste.

Ai u mor si rob lufte nga Rusia dhe qëndroi në robëri për më shumë se dy vjet para se të lirohej rreth një vit më parë si pjesë e një shkëmbimi të burgosurish.

Përveç Butkevychit, të nominuarit e këtij viti në listën e ngushtë përfshinin gazetaren gjeorgjiane, Mzia Amaglobeli, e cila bashkëthemeloi mediat e pavarura “Batumelebi” dhe “Netgazeti”, dhe Ulvi Hasanli nga Azerbajxhani, i cili ka qenë drejtor i kompanisë së pavarur mediatike “Abzas Media” që nga viti 2016.

“Nuk është rastësi që të tre të nominuarit janë profesionistë të medias”, tha presidenti i Asamblesë Parlamentare, Theodoros Rousopoulos.

Çmimi ka një vlerë prej 60 000 eurosh dhe mban emrin e aktivistit të ndjerë të të drejtave civile dhe ish-presidentit çek, Vaclav Havel.