Guardiola komenton të ardhmen e Haalandit

Trajneri i Manchester City-t, Pep Guardiola, ka komentuar në mënyrë të pazakontë mbi raportimet që lidhin Erling Haalandin me ish-klubin e tij, Barcelonën.

Në një deklaratë të bërë së fundmi, Guardiola pranoi se çdo klub në botë do të dëshironte të kishte sulmuesin norvegjez në skuadër.

“A mund të më tregoni një klub që nuk do ta ëndërronte Erling Haalandin? E kuptoj ëndrrën e Barcelonës për Erlingun, ashtu si edhe të çdo klubi tjetër në botë. Nëse Erling nuk do të ishte me ne, do të ishte ëndërr edhe për Manchester City-n ta kishte atë,” tha Guardiola.

Trajneri shtoi se nuk di çfarë mund të ndodhë në të ardhmen, por theksoi se Haaland është i lumtur në Manchester dhe po kalon një periudhë shumë të mirë.

“Ai ka një kontratë të gjatë këtu, po shënon shumë gola dhe po e ndihmon shumë skuadrën. Nuk mendoj se Erling është aq naiv sa të nënshkruajë diçka që nuk dëshiron ta përmbushë. Por në futboll, askush nuk e di se çfarë mund të ndodhë më pas,”  shtoi ai.

Gjithsesi një transferim i Haalandit në Barcelonë konsiderohet jashtëzakonisht i pamundur në të ardhmen e afërt, për shkak të problemeve të njohura financiare të klubit katalanas.