Zjarri përfshin shtëpinë e Vinicius në Madrid

Shtëpia e Vinicius Junior është prekur nga një zjarr, pas djegies së saunës në bodrum.

Zjarri me origjinë elektrike ka përfshirë mëngjesin e së enjtes banesën e sulmuesit të Real Madridit në La Moraleja, Alcobendas. Sauna e bodrumit u shkatërrua totalisht.

Njoftimi u bë në numrin 112 rreth orës 11:00 dhe dy ekipe zjarrfikësish nga Madridi vunë nën kontroll flakët dhe ventiluan ambientet e prekura.

Tymi i madh mbuloi dy kate të shtëpisë, por nuk pati të lënduar apo të helmuar.

Futbollisti nuk ishte në shtëpi gjatë incidentit. Hetimet paraprake sugjerojnë një defekt elektrik si shkak. Rreth orës 12:00, zjarrfikësit u larguan nga vendi i ngjarjes pasi situata ishte vendosur nën kontroll.

Aktualisht, Vinicius është me kombëtaren e Brazilit në Seul, së bashku me shokët e skuadrës Militao dhe Rodrygo. Nën drejtimin e Carlo Ancelottit, Brazili do të përballet me Korenë e Jugut më 10 tetor dhe me Japoninë më 14 tetor.