Sacchi pëlqen Zidane-n për trajner të Juvës

Ish-trajneri legjendar i AC Milan, Arrigo Sacchi, dëshiron që një ditë Zinedine Zidane të merr drejtimin e Juventusit.

Gjatë një interviste për “La Gazzetta dello Sport”, Sacchi foli për mundësinë e rikthimit të francezit në Serinë A si trajner.

“E pyes veten, pse një trajner që krijoi një makineri kaq të bukur nuk është aktiv? E di që ai dëshiron të drejtojë Francën, dhe kjo është e kuptueshme. Si futbollist, ai ishte hero i vendit të tij, duke e udhëhequr së pari për të fituar botën dhe më pas Europën”, tha Sacchi.

“Zidane ishte një lojtar i madh i Juventusit, u bë kampion me fanellën bardhezi, pati një mentor si Marcello Lippi që e udhëhoqi në karrierën e tij si trajner, ndoqi këshillat e tij, pse të mos imagjinojmë që një ditë të jetë në stol te Juventusi? Natyrisht, jo menjëherë, jo tani, për të mos qenë i papërshtatshëm ndaj punës së Igor Tudor”, ka theksuar ai.

Sacchi pëlqen stilin e Zidane si trajner dhe ndikimin që mund të kishte në Serinë A.

“Do të doja që dikush si Zidane, që gjithmonë ka prioritetizuar futbollin sulmues, që beson te loja e ekipit dhe talenti që shërben për ekipin, të hynte në Serinë A. Liga jonë do të përfitonte shumë nga prania e tij. Dhe pastaj, Zidane në stol te Juventusi do t’i sillte një prekje romancë, që në futbollin bashkëkohor ndonjëherë mungon. Mendoni për Zizou-n”, ka përfunduar Sacchi.

Sacchi sugjeron se rikthimi i Zidane në Itali si trajner mund të sjellë jo vetëm sukses sportiv, por edhe një stil futbolli më të bukur dhe më tërheqës për tifozët italianë.