Belgjika blen avionë luftarakë amerikanë

Tre avionët e parë luftarakë belgë F-35 zbarkuan sot në bazën ajrore Florennes në provincën e Namur, ndërsa avioni i katërt, sipas raportimeve të mediave lokale, mbeti në tokë për shkak të një defekti teknik.

Katër avionët, të porositur nga një prodhues amerikan, u nisën nga Teksasi javën e kaluar, me një ndalesë të planifikuar në Azore, raporton Anadolu.

Të tre avionët përfunduan me sukses pjesën e fundit të fluturimit prej 2,800 kilometrash dhe zbarkuan në Belgjikë pak pas orës 3 pasdite. sipas kohës lokale, në prani të Mbretit Philippe, kreut të mbrojtjes dhe disa ministrave federalë.

Sipas gazetës Het Laatste Nieuws, avioni i katërt, i cili duhej të fluturonte me të tjerët, pësoi një "prishje ose problem teknik" që e pengoi të mbërrinte në Belgjikë.

Ministria e mbrojtjes e përshkroi situatën si një "pasiguri teknike" dhe theksoi se siguria ishte përparësia.

Më herët gjatë ditës, Ministri i Mbrojtjes Theo Francken përuroi një kompleks të ri mirëmbajtjeje për avionët F-35 në Florennes, duke shënuar një hap të rëndësishëm në transformimin strategjik ushtarak të Belgjikës.

Avioni i ri F-35 do të zëvendësojë avionët F-16 që kanë qenë në shërbim me forcën ajrore belge për më shumë se 40 vjet. Pilotët dhe teknikët belgë do të trajnohen në Shtetet e Bashkuara, së bashku me homologët e tyre ndërkombëtarë.

Belgjika deri më tani ka porositur 34 avionë F-35 dhe planifikon të blejë 11 të tjerë, konfirmoi Francken, duke theksuar se Belgjika është "e përkushtuar ti bashkohet mburojës prej më shumë se 700 avionësh që mbrojnë hapësirën ajrore evropiane".